Pèchi Portugues a heridá vários persona na playanan parti sùit i Banda Bou

Pèchi Portugues a heridá vários persona na playanan parti sùit i Banda Bou

Willemstad –  Ministero di Salubridat, Medio Ambiente i Naturalesa ta partisipá ku a señalá Pèchi Portugues na playanan di Mambo Beach, Janthiel i playanan di Banda Bou. Ministerio di GMN a risibí for di ofisina di Huisartsenpost Curaçao (HAP) konfirmashon ku un total di 13 persona e mèldu serka nan ku heridanan di Pèchi Portugues durante e oranan ku a transkurí di ayera pa awe. Ta trata aki di personanan ku tabata na Mambo Beach, Janthiel i algun playa na Banda Bou. Ta konsehá personanan ku ta bishitá playanan na parti sùit òf den área di Banda Bou e dianan aki pa paga bon tinu. Kambio di direkshon di bientu òf kambio di koriente di laman ta trese organismonan ku ta drif den laman direkshon di nos kosta.

Pèchi Portugues ta relativamente fásil pa mira den laman. Bo ta rekonosé na su forma di un blas òf saku di plèstik lilá yená ku airu di mas òf ménos 25 sentimeter i ta drif den laman. Si bo mir’é, keda leu, su tentakulonan bou di laman por alkansá mas ku 15 meter. Si bo bini den kontakto ku su tentakulonan, kita restante di tentakulo ku keda riba bo kueru sin grawat’é, laba e kueru ku awa di laman i apliká awa lou riba e área afektá. Tambe por apliká binager regular slap (1 pa 2 dòpi den 2 liter di awa) riba e área afektá. Si e área afektá keda kima òf hasi doló intenso, pone eis riba dje i bishitá bo dòkter di kas.

Riba potrèt, Pèchi Portugues ku ta drif den laman.

Riba potrèt, un slòf pa kompará su grandura ku esun di un Pèchi Portugues.

Riba potrèt, por mira e parti di e Pèchi Portugues ku semper ta keda bou di laman i ku por alkansá un largura di mas ku 15 meter.