La Cabana Beach Resort a organisa nan ‘Benefit Fair & Expo’
La Cabana Beach Resort a organisa nan ‘Benefit Fair & Expo’
EAGLE BEACH – La Cabana Beach Resort & Casino recientemente a host un evento hopi anticipa, ‘Benefit Fair’ cu e meta pa sostene, informa, y empodera su empleadonan. E evento di tres dia aki a consisti di un line-up impresionante di partners, incluyendo representantenan di Citizens Insurance Aruba, kende a provee splicacion detaya riba nan opcionnan di seguro medico, Sagicor Life Inc., ofreciendo conocemento den loke ta seguro di bida, Pension Fund Tourism Sector Aruba (PFTSA), cubriendo e plannan di pension obtenibel pa trahadonan den sector di hospitalidad; Aruba Bank N.V., discutiendo oportunidadnan di spaar; y Centro di Desaroyo Humano V.O.F., brindando guia y desaroyo personal.
Invitado special dr. Howard van Niel a contribui cu su expertisio regardando cirugia plastico, haciendo e evento uno mas impactante ainda cu su consehonan valioso. Tri Bike a presenta e programa Employee Bike diseña pa yuda empleadonan den movecion cu mountain bike y ehercicio.
La Cabana ta extende su gratitud na tur representante pa nan tempo, esfuerso, y compromiso den yuda e empleadonan compronde y haya acceso na beneficionan esencial. E sosten di partners y otro sostenedonan a sigura e exito di e evento aki, reinforsando La Cabana su dedicacion na e bienestar di su team.
Segun Tessely Koolman, Director di HR, e encuentro aki a brinda un oportunidad pa por comparti e beneficionan obtenibel na empleadonan na e resort, unda cu nan por ta mas consciente di servicionan y posibilidadnan existente. Beneficionan excelente di trabao, segun Koolman, ta yuda crea un team di empleado hopi mas dedica, y ta minimalisa absencia.
Un encuesta recien di HR ta mustra cu bon beneficionan ta mesun importante cu un salario generoso, pasobra nan ta atrae y retene e empleadonan cu tin hopi mas abilidad y skill, cual ta crea un fundacion fuerte pa henter e negoshi. Empleadonan ta haya amor pa un compania cu realmente ta worry cu nan y nan bienestar.
