Gobièrnu di Kòrsou ta reuní pa evaluá kandela na Bivak

WILLEMSTAD – Djabièrnè, 23 di òktober, Promé Minister Gilmar Pisas a konvoká un reunion ku e diferente ministerio i instansianan ku a atendé ku e kandela grandi na ‘Industrieterein’ Heintje Kool ku a kuminsá djaweps, 22 di òktober den oranan di atardi. Meta di e reunion tabata pa evaluá e akshonnan ku a tuma lugá, interkambiá informashon i koordiná e próksimo pasonan, ku atenshon spesial pa prevenshon i seguridat di nos komunidat.

Huntu ku Promé Minister tabata presente Minister Hato, Minister Boekhoudt, Minister Cooper, Minister America-Francisca i Minister Middelhof. Organisashonnan ku a forma parti di e reunion tabata Brantwer Kòrsou, Kuerpo Polisial (KPC), Direktorado di Kontrol di Riesgo i Maneho pa Kalamidat (DRR), Sektor di Medio Ambiente i Naturalesa i Inspekshon di Ministerio di Salubridat, Medio Ambiente i Naturalesa (GMN), representatenan di Ministerio di Desaroyo Ekonómiko i Ministerio di Desaroyo Sosial, Labor i Bienestar (SOAW), Aqualectra i ‘Veiligheidsdienst Curaçao’ (VDC).

Durante di e reunion, kada instansia a duna un splikashon di su trabounan i e medidanan ku a tuma. Tambe a papia tokante e kooperashon entre e servisionan i e puntonan ku ta meresé mas atenshon pa fortalesé e preparashon i kon pa atendé ku situashonnan similar.

Un di e temanan ku a bin dilanti tabata e importansia di un bon koordinashon den e proseso di otorgamentu di pèrmit, inspekshon i kontrol. Den e kuadro aki, a papia tokante kon e instansianan por koordiná nan trabou mihó pa identifiká riesgonan na tempu i stimulá kumplimentu ku e kondishonnan stipulá.

Ademas, a akordá pa forma un grupo di trabou bou di koordinashon di Direktor di e Direktorado di Kontrol di Riesgo i Maneho pa Kalamidat i alabes Koordinadó Nashonal di Krísis, señor Lesley Fer. E grupo di trabou lo enfoká riba prevenshon i maneho di riesgo di ‘scrapyard’ i otro lugánan ku por presentá un riesgo di kandela. E instansianan envolví lo traha huntu pa evaluá e situashon, identifiká riesgonan i koordiná e medidanan preventivo i plan di akshon nesesario.

E meta ta pa fortalesé kooperashon multidisiplinario i preparashon promé ku un insidente tuma lugá, pa redusí e riesgo di kandela i limitá su posibel konsekuensianan. E reunion ta parti di e esfuerso di Gobièrnu pa fortalesé kooperashon entre e servisionan i sigui traha riba prevenshon, preparashon i seguridat di komunidat.

Palabra di gradesimentu na un i tur ku a duna nan aporte di un manera òf otro durante e kandela na Bivak.

Reunion kandela Bivak