Prekario Karnaval 2025 ta habri pa públiko dia 4 di novèmber 2024

Willemstad – Servisio pa Planifikashon Urbano (ROP) i tim multidisiplinario di Prekario Karnaval, ta anunsiá ku su ofisina ta habri riba djaluna 4 di novèmber 2024. Esaki ta pa atendé tur kliente ku mester atendé nan pèrmit di prekario pone stènt òf stelage riba ruta di Karnaval 2025.

Tim di Prekario Karnaval 2025 lo ofresé e siguiente manera pa registrashon i pa pago di prekario pa stènt òf stelage pa Karnaval 2025, spesífikamente pa tur kliente eksistente. Ruta di Karnaval ta dividí den 4 sekshon: lèternan A, B, C i D.

Registrashon i pago ta pa tur kliente eksistente: tur kliente eksistente ta traha un sita pa pasa na ofisina. E ofisina di ROP ta keda na Plasa Horacio Hoyer 19 i por skohe un fecha pa sita entre 1.30 pa 4or di mèrdia. Tur kliente eksistente por subi e siguiente link pa traha un sita https://www.prekariocuracao.com/sita.

Tim di Prekario ta indiká ku personanan ku ta registrá anteriormente komo promé òf di dos nòmber riba e pèrmit, por bini na ofisina pa hasi registrashon. Na momentu ku e kliente tin ku bin pa su sita, e mester bin ku ID bálido pa por identifiká su mes.

Lista di espera:

Tur persona, ku no ta kliente eksistente, i ta deseá na risibí un espasio pa ubika su mes riba ruta di karnaval, por subi riba e lista di espera. E lista di espera aki su link ta https://prekariocuracao.com/requestprekario

Último dia pa registrá ta 20 desèmber 2024.

Derechi di prekario pèrdí

Tur kliente eksistente mester a kumpli ku reglanan stipulá den e pèrmit di prekario na momentu di kita stelage despues di Karnaval 2024. Pa Karnaval 2024, e fecha pa kita stelage tabata 18 di febrüari 2024 promé ku 3or di atardi. Dado kaso ku e kliente no a kumpli ku e obligashon aki, e persona a risibí un yamada i un karta pa inform’é ku el a pèrdè su derechi di prekario.

Tim di Prekario pa Karnaval 2024 ta gradesí adelantá pa e koperashon durante e dianan di entrega di pèrmit. Ofisina di Tim di Prekario Karnaval 2025 ta alkansabel vía e numbernan 433-3221 i 511-3874. E number 511-3874 ta alkansabel vía di WhatsApp tambe. Por tuma kontakto ku e tim vía di mail na info@prekariocuracao.com.