Global Entrepreneurship Week Curaçao ta klousurá ku rekonosementu na 5 dama ku un karera ehemplar

Global Entrepreneurship Week Curaçao ta klousurá ku rekonosementu na 5 dama ku un karera ehemplar

WILLEMSTAD – Djadumingu atardi 24 di Novèmber, e direktiva di Global Entrepreneurship Week (GEW Curaçao), kompañá pa diferente partner, spònser i invitado a klousurá un seri amplio i diverso di aktividat. E ‘Awards Event’ tabatin komo ‘highlight’, rekonosementu na 5 dama ku un karera ehemplar.

E evento a tuma lugá den oranan di atardi den ouditorio di Banko Sentral di Kòrsou i Sint Maarten. Banda di e parti ofisial durante kua a tira lus riba karera di e 5 damanan, tabatin presentashon di e kantante lokal Aemy Niafelis i tambe di e artista Ma Yeta komo e parti di entretenimentu.. Sra. Elgenia Pieternella, presidente di Fundashon Negoshi Pikiña (FNP), di kua Global Entrepreurship Week ta un di e proyektonan di e fundashon, a hiba diskurso den kua entre otro el a gradisí e 5 damanan galardoná pa nan trabounan asina meritorio durante dékadanan. Ounke e sa, manera sra. Pieternella a bisa, niun a realisá nan trabounan en buska galardon, e ta di opinion ku nos mester mustra apresio pa nos hendenan ku ta hasi bon trabou, i no sinta warda pa otronan bin hasi esaki. Alabes sra. Pieternella a gradisí tur spònser i partner, ku sin nan konfiansa,  aporte i kolaborashon, e di 10 edishon di GEW Curaçao lo no tabata posibel, e presidente di GEW Dutch Caribbean a bisa.

E 5 damanan riba kua a tira lus i duna un plaka di rekonosementu ta: Sra. Helen Hoyer, propietario i direktor di Radio Hoyer, sra. Crisma Henriquez, propietario i direktor di agensia funerario El Señorial, sra. Valesca Diaz, redaktor en hefe di Extra, sra. Jachmin Pinedoe, direktor di Direct Multimedia i Harbor Hotel i sra. Nataly Antonia-Petronia, direktor di Radio Mas i produktor di programanan informativo na Televishon.

Tabata klousura di un seri di evento ku a dura algun siman, i a variá di ‘keynote speeches’ di oradornan internashonal i lokal, charlanan i seshonnan di diskushonnan ku panelnan di ekspertonan, workshops, seshonnan informativo, webinars, eksposishonnan, tastings i eventonan pa amplia ret di kontakto.

Remarkabel ta alabes ku studiantenan di diferente skol ta a partisipá hopi aktivo na GEW Curaçao. E skol Nilda Pinto SBO, pa di 2 aña konsekutivo, ta tene un siman kompleto di aktividat den kuadro di GEW Curaçao i e aña aki esei tabata e kaso tambe ku Frater Aurelio SBO. Komo apertura di e siman ofisial di GEW Curaçao, prínsipe Constantijn, di Kas Real di Hulanda, tambe tabatin un enkuentro ‘online’ ku studiantenan di diferente skol avansá durante kua el a elaborá riba temanan relashoná ku ‘entrepreneurship’ i alabes a una tep i a kontestá preguntanan di e studiantenan kende nan tabata hopi aktivo den e seshon ‘online’ menshoná.