Fundashon Desaroyo Karnaval Kòrsou (FDKK) a presentá su plannan pa Karnaval 2025.

 

 

Willemstad: Durante un enkuentro ku prensa djamars 26 di novèmber 2024, Fundashon Desaroyo
Karnaval Kòrsou (FDKK) a presentá su plannan pa Karnaval 2025.
Manteniendo e slogan “Nos Karnaval”, FDKK ta enfatisá ku e Karnaval di Kòrsou ta unu sumamente
impaktante i importante, i ku henter komunidat di Kòrsou ta forma parti di e selebrashon. E temporada
aki lo ta un poko mas largu kuminsando dia 11 di yanuari ku “Apertura di Karnaval” i ta termina dia 8 di
mart ku e evento di klousura.
Kontinuando ku e vishon pa por jega na un organisashon di Karnaval independiente i tambe wardando
riba e resultadonan di e simposio organisá dor di departamento di OWCS huntu ku e universidatnan
ICUC i UOC ku e meta pa alsa kalidat di “Nos Karnaval”, e enfoke di FDKK 2025 ta pa tin un karnaval
sumamente strukturá kaminda respet, kreatividat, ambiente, seguridat i responsabilidat di
kompatibilidat lo ta sentral. Ketubai e esefuerson nan ta hasi pa krese e produkto Karnaval i asina
oumentá nos mikro pero tambe makro-ekonomia durante e periodo aki.
FDKK ta konvensí ku den 2025 tambe Kòrsou lo konosé un Karnaval bunita. Mirando e presentashonnan
di diferente grupo di karnaval , no tin duda ku esaki lo ta e kaso.
Apertura di karnaval: 11 di Yanüari 2025
Na 2023 a lansa e konsepto nobo, kaminda mayoria banda popular, grupo di karnaval, turista, artista
individual i e grupo grandi di fanátiko di karnaval a partisipá na Apertura di karnaval. Esaki por bisa sin
duda ku tabata un éksito rotundo.
Na 2024, FDKK a amplia e eksperiensa aki. Nos tur por korda kon e grupo nan di karnaval a partisipá den
e “Marcha di Karnaval” den Curaçao Festival Center pero tambe ku tur e gruponan por topa i gosa
huntu ku otro den e “Carnival Village”, a hasi e eksperiensa aki uniko.
Pa 2025, FDKK huntu AGKK i tur su partnernan, a disidi di duna Kòrsou un apertura aún mas grandi. Un
apertura ku ta kombina e tres aspektonan prinsipal ku ta denomina nos temporada di karnaval, ku ta:
Marcha di Karnaval, Jump Up i Jump In. Nos a skucha i nos lo kumpli ku e deseo di pueblo.
Apertura di karnaval lo ta dia 11 di yanuari i lo tin dos parada riba kaya. Saliendo for di Jannoorduyn
weg lo tin un parada pa nos muchanan. Esaki lo ta un parada kombina ku gruponan di karnaval di mucha
disfrasá i tras di e grupo aki lo tiin espasio pa mayornan kumpra un t-shirt, pa asina un otro grupo di
mucha por partisipa den e Jump Up huntu ku e gruponan disfrasá.
Despues di e parada di mucha, lo tin un di dos parada ta for di Jannoorduynweg direkshon di Capital Ç
(Curaçao Airport Venue). Esaki lo konsisti di un “Tiner Parade” i un marcha pa adulto. Akinan tambe,
tantu e tiner i e adulto ku no ta partisipa den e marchanan disfrasa lo tin e oportunidat di kumpra un t
shirt pa por partisipa den e Jump Up. E t-shirt aki lo ta e entrada pa e tiner i tambe adulto pa e tremendo
Jump In Festival ku lo tin despues di e parada den Capital Ç (Curaçao Airport Venue) ku e agrupashonnan
lokal manera ERA, ONE, GRUPO GRIK, RCO, artista urbano Dongo. Tambe lo tin tambe e DJnan popular
manera DJ FAB i DJ KROKZZ.
Pa e diferente parada nan riba kaya, lo tin e trailernan manera ta kustumbra den marcha di karnaval, ku
DJ BLACK, DJ RO-1 i tambe HUERTA TA TOKA.
Apertura di Karnaval no por ta kompleto sin presentashon di su REI DI TUMBA, pesei e anochi aki, nos
Rei di Tumba ADJATAY, tambe lo tei presente.
Sigi tur medionan di komunikashon pa tur infomrashon ku FDKK i AGKK lo duna tokante e konsepto
nobo aki di Apertura di Karnaval. Un kos sigur ta ku e evento aki lo ta pa henter famia.
Tumba Hubenil: 25 di Yanüari 2025
Tumba Hubenil 2025 lo ta un biaha mas un kolaborashon entre FDKK i BOLDSTARSZ, presidi pa Sr.
Heinrich “Richie Rich” Pieter. Punto sentral di Tumba Hubenil lo ta partisipashon i no direktamente
kompetensia. Envolvimentu di e mayor lo ta importante den henter e trayekto di e artista hóben. Tema
di Tumba Hubenil 2025 lo ta: ‘Back in the time’
Pa e edishon di 2025, Tumba Hubenil lo ta na Capital Ç ku un produkshon netamente diseñá pa e hóben
i su famia. Den produkshon aki, nos a konsentrá riba entretenimiento di e Tumbero partisipante, su
fanátiko, e mayornan i demas publiko. Lo ta un edishon ku kompetensia fuerte, pero alabes
manteniendo e aspekto karnavalesko.
Elekshon Reina, Rei, Prens i Pancho: 31 di Yanüari i 1 – 2 di Februari 2025
Kòrsou lo tin diferente evento di elekshon pa skohe nos Rei i Reina Tiner, Reina Prens i Pancho Hubenil I
Reina, Prens i Pancho Grandi. Siguí medionan di komunikashon pa mas informashon.
Marcha di Karnaval Hubenil, Tiner Adulto
FDKK ta siguí enfatisá ku un punto di suma importansha lo ta e maneho di e diferente marchanan. Nan
ta siguí ku e enfoke pa struktura henter e proseso di maneho di marcha pa asina yega na un marcha
disipliná i ku ménos o obstákulo posibel. Un marcha ku ta sali na tempu i ku ménos “buraku” posibel. Un
marcha kaminda ku e partisipante no ta sinti ku ta “kore e ta kore”, en bes di djump. Esaki ta un
proseso ku a inisiá huntu ku diferente instansianan manera KPC, Brantwer, Ambulans, chauffernan di
trekker, kolaboradornan, i AGKK. Tur esaki ta konta pa marcha di Kabai, Hubenil, Tiner i Adulto. Pa ku
2025 e ruta di karnaval ta meskos. Wak kalendario di marcha pa e diferente fecha i orario nan.
Klousura Karnaval 2025: 08 di Maart 2025
E evento di klousura di karnaval pa 2025 tambe lo tuma luga na Capital C. Espektativa nan for di awoki ta
haltu. No solamente pa e motibu di e kalidat di kreatividat ku gruponan a presenta kaba pero tambe pa
e nivel ku e evento aki a keda organisa na 2024. Komo un fanatiko di karnaval mi ta konsehabo pa hinka
e fecha aki for di awoki den bo agenda.
E kùp di “Nos Karnaval” 2024:
Na 2023 a introdusi e kampaña pa tene Kòrsou limpi durante e temporada di karnaval. E kùp di karnaval
sigur tabata un eksito total. Na 2024 a sigui ku e kampaña aki i pueblo di Kòrsou a sigui brasa e inisiativa
aki. Un beker di aluminium duradero huntu ku su “sleeve” i tambe tapa riba dje. Ku e kambio nan aki nos
a demostra di ta karnavalista responsabel i ku kurason pa nos Pais.
2025 FDKK huntu ku Minister Sithree van Heydoorn a presenta un kampaña nobo ku un mensahe aun
mas fuerte. Sera konosi ku “Limpi”. Un beker di aluminium ku su “sleeve”, ku lo wordu introdusi den
temporada di karnaval pero ku awor nos por keda husa durante henter aña. Djadumingu nos tur ta lanta
pa limpia kas pa asina nos habri siman ku un hogar “limpi”, komo un bon yu di Korsou nos tin un kurason
“limpi”, bo ta bishita fiesta riba “Wega Limpi”, pesei for di awe unda ku bo bai bo tin bo beker paso abo
tambe ta kontribui na un Korsou “Limpi”.
Por ultimo FDKK ta informa ku karnaval di Korsou tin hopi gastu envolví i aunke ku organisashon di
karnaval ta haña supsidio di gobièrnu di Kòrsou esaki no ta sufisiente pa karga tur gastu. Pa e motibu aki
FDKK ta súplika komunidat speshalmente e fanátiko di karnaval pa aportá na diferente aktividat di
‘fundraising’ pa asina FDKK i tambe gruponan di karnaval por presentá den e marchanan. Den mes rosea
Sr. Harms a súplika na komersio pa nan tambe aportá. Aunke ku e situashon finansiero i ekonómiko ta
difísil, Kòrsou tin benefisio na e evento di Karnaval. Nos ekonomia ta fortalesé durante e periodo aki i
nos mester karga e gastunan pa ku esaki huntu.
Nos Karnaval Podcast ku Kora Faneyte
For di e prome siman di desember 2024, Nos Karnaval i Kora Faneyte lo ranka sali ku e podcast ‘Nos
Karnaval’. Esaki lo wordu transmiti riba plataforma di Nos Karnaval i Vigilante. E podcast aki lo focus riba
informashon profundo di kiko realmente karnaval di Korsou ta nifika pa nos komunidat i nos pais, pero
tambe lo tin e sekshon kayente, ‘Den Kora’.
Ta un honor ku nos tin e oportunidat un biaha mas (pa di 3 anja) di organisá un magno evento manera
nos karnaval di Kòrsou. FDKK huntu ku AGKK i tur su partnernan ta determiná, i ta kla pa Nos Karnaval
2025.
Felis Karnaval