NA MEMORIA DI E GRAN BALUARTE MUSIKAL KULTURAL I DIRIGENTE ERNEST “KEKE” WILLEMS
30 di Novèmber 2024
NA MEMORIA DI E GRAN BALUARTE MUSIKAL KULTURAL
I DIRIGENTE ERNEST “KEKE” WILLEMS
Direktiva di AMAK a risibí e notisia tristu ku Ernest “Keke” Willems ya no ta huntu ku nos mas. Ernest tabata un gran personahe ku a marka pauta riba diferente tereno manera periodismo, komo kantante kompositor i dirigente.
Semper nos a konosé Ernest Willems komo un pèrsona krítiko ku ta trese su opinion fuerte dilanti, aunke kisas no tur ora e ta kai den bon tera.
Promé ku Keke a drenta direktiva di AMAK, Dirigentenan di AMAK tabata tin un impreshon diferente di su forma di ser. Na momentu ku na 1996 el a ofresé pa bin duna un man den direktiva di AMAK, gradualmente por a nota ku Ernest ta un pèrsona ku semper bai ta trese su opinion den un forma transparente dilanti. Ernest Willems a demostrá ku e ta loyal na e organisashon kual e ta pertenesé.
Ernest Willems for di 1996 te ku 2022 a okupá diferente funkshon den direktiva di AMAK manera Komisario, Sekretario i ultimo añanan Vise Presidente.
Ernest a demostrá su kapasidat riba tereno musikal, kaminda e tabata krea obranan ku kontenido profundo i komo ku e tabata tin bon dominio di su idiomanan, espesialmente papiamentu, spañó i ingles, e tabata tin e don pa skibi ku hopi fasilidat.
Ernest a partisipá den diferente festival di kansionnan lokal i tambe internashonal i semper el a hasi esaki den gran forma.
Ultimo añanan Ernest a konfrontá problemanan ku su salud i na varios okashon e mester a biaha pa eksterior pa risibí tratamentu médiko avansá. Danki Dios Ernest por a gosa di respaldo kompletu di su Sra. Silvana ku tabata duné tur guia i asistensia nesesario pa e por a rekobra su salud.
Den direktiva Ernest Willems tabata e pèrsona ku su ekspreshonnan chistoso.
Na momentu di tuma desishonnan grandi, semper Ernest tabata sostené tur lokual ku ta na bienestar di organisashon.
Pa motibunan di su salud, e pareha a bai pa un temporada Hulanda, pa aya por haña tratonan médiko mas avansá i fasilidatnan ku ta importante durate su rekuperashon.
Na okashon di su selebrashon di 75 aña na Hulanda ku ela selebrá esaki en grande entre su famia i amistadesnan. Bou di kordinashon di Sra. Silvana Willems, e por a presentá un buki den kua Ernest a deskribí e maleza di Altzeimer i tur e partinan importante ku mester tene kuenta kune pa hendenan ku ta sufri di e malesa aki.
30 di novèmber, ser supremo a tuma desishon pa yama Ernest pa bin gosa na un lugá den su rèino i disfrutá di sosiego enterno ku e meresé.
Ernest ta keda den memoria di miebronan di direktiva di AMAK, den mundu di periodismo i den Farándula di Kòrsou komo un baluarte musikal i kultural importante ku a laga memorianan positivo atras.
Ku su alma sosega na pas.
Direktiva di AMAK
