KÒRSOU TA MOVE KAMINATA: UN ÉKSITO TOTÁL!
Willemstad, 1 desèmber 2024
Djasabra, 30 di novèmber, Kòrsou tabata yen di energia i entusiasmo durante
e evento tan antisipá: Kòrsou ta Move Kaminata. E inisiativa aki, lansá dor di
Ministerio di GMN i OWCS, tin komo meta pa eduká nos isla kon pa biba un
bida salú. Ta importante pa pueblo di Kòrsou sa ku moveshon i kome
saludabel ta un parti esensial di bida.
E evento tabata un selebrashon vibrante, ku aktividadnan i mùzik ku hopi
energia positivo. E atardi a kuminsá ku DJ Fab i MC Chris Strick, ku a kalentá e
publiko ku ritmo nan vibrante.
Partisipantenan a haña mas motivashon durante e warm up dinamiko dirigí dor
di Cons Fitness. Minister Silvania a duna un diskurso inspirativo promé ku e
konteo huntu pa e publiko kuminsá e kaminata.
E grupo a kuminsá kana direkshon di Brionplein via di Zakito/koredor kaminda
PCD brassband a animá e partisipantenan. Na final di koredor e
partisipantenan por a partisipá na un ‘obstacle course’ organisá dor Cons
Fitness. E ambiente a bira aún mas energétiko ora ku One Flavaz a uni ku e
kaminata, i a guia e kaminata aki pa Brionplein.
Na final tur partisipante a risibí boter di awa, bebidanan deportivo i fruta
grátis pa hidratá i refreská nan mes. Durante e evento tambe por a hasi
tèstnan di salú gratis na ADC i tuma masashi pa rilèks.
Tambe nos a sigui move riba ritmonan di Icons. Partisipantenan a selebrá ku
alegria, baile, i un sintimentu di union. E kantidat di partisipantenan i e
energia positivo di e evento ta mustra e importansia di promové un estilo di
bida salú den komunidat.
Tipo di eventonan manera esaki ta demostrá di uni hende no solamente pa
hasi aktividat físiko, pero tambe pa fortalesé e laso entre hende den
komunidat.
Minister Silvania a ekspresá su deseo ku Kòrsou ta Move lo krea
konsientisashon kontinuo tokante e benefisionan di aktividat físiko i un bida
salú. E ke enfatisá ku esaki ta apenas e komienso. Ku mas eventonan similar ta
na horizonte, Kòrsou ta un paso mas serka pa bira un komunidat mas salú i
aktivo.
Pa mas informashon tokante eventonan den futúro, keda sigui e kanalnan di
Kòrsou ta move riba Facebook, Instagram, YouTube i tambe Ministerio di
GMN i OWCS
Un pais ku ta move, ta un pais salú. Kòrsou ta move!






