FESTIVAL DI TUMBA 2025

INTRODUKSHON

Ya nos ta yegando momentunan kulminante pa Kòrsou por sera konosí i presensia e di 53
edishon di festival di tumba 2025.
Un festival kaminda Kòrsou lo bai sera konosí ku mas inovashon. Hopi ta e trabounan ku a
tuma lugá pa por yega na e organisashon di e festival di mas grandi aki na Kòrsou i esun di
mas aña den nos hemisferio.
Manfred Gomes i su tim dinámiko ku ta asistí direktiva di AMAK den e organisashon di
tumba ta trahando duru pa tur ku gusta nan festival di tumba por sinti nan den un festival di
un nivel altísimo. Esaki mirando ku e festival di awendia no ta e festival di ayera mas. E
evento a bira di tal magnitut ku direktiva mester a buska algun persona ku konosementu vasto
riba sierto materia pa yuda direktiva kana den e direkshon di e Festival di Tumba 2025.

E DI 53 EDISHON DI FESTIVAL DI TUMBA
Direktiva di AMAK huntu ku su kolaboradornan i kordinadónan, a reuní na vários okashon
pa hasi preparashonnan nesesario pa lokual ta trata Festival di Tumba 2025. Festival di
Tumba 2025 lo ta e di 53 edishon di Festival di Tumba. “Stakeholders” nan importante
manera musikonan, kompania di seguridat, kompania di sonido i dekorashon riba steig,
huradonan, kompania di produkshon i kompania ku ta hasi e merkadeo ta kompletamente
inbolbi de e preparashonan. Tambe fechanan importante di Festival di Tumba 2025 a keda
stipulá.
Fechanan importante :
 15 desèmber 2024 : Benta di karchi di preis speshal di PPV ta inisiá
 21 di desèmber 2024 : E último benta di karchi na preis speshal
 7 di yanüari 2025 : Rueda di prensa den kual ta bai anuniá na ken Festival di Tumba
2025 ta dediká na dje, kambionan den Curacao Festival Center, detayenan di
inskripshon di Festival di Tumba 2025 i introdukshon di nos Partnernan ofisialmente
 26 di yanüari 2025 : Inskripshon di Tumba 2025.
 30 yanüari 2025 : Entrega di letra
 3,4,5 i 7 di febrüari 2025 : 4 anochinan di Festival di Tumba 2025
 6 di febrüari 2025 : Suerte di banda pa e anochi final i presentashon di mantel i korona

UN DANKI DI KURASON NA NOS PARTNERNAN KU A KONFIRMA:
AMAK ta gradisí tur Branding Partner ku ya a konfirmá nan partisipashon den Festival di
Tumba 2025. AMAK ta yama bon bini na Smart Tech kual ta un Branding Partner nobo. Nos
partnernan a demostrá ku nan ta kere den Festival di Tumba, nan ta kere den nos kultura i nan
ta kere den nos artista i musikonan i nan kreatividat, Branding partnernan Festival di Tumba
2025:
-Medical Laboratories Services
-Licores Maduro
-FLOW
-Venequip Curacao
-Star Motors
-Reshapers (enkarga ku e parti di merkadeo)
-OWCS
-Kooyman
-Global Painting
-CTB
-Massive
-Smart Tech
-Greenhouse i Bocas restaurant
-Fun Miles
AMAK ta den kombersashon ku algun kompania mas ku pronto lo djòin e “dreamteam” di
partnernan di Festival di Tumba 2025.

ESPEKTATIVANAN PA E FESTIVAL DI TUMBA 2025 TA HOPI HALTU
Direktiva di AMAK huntu ku su komishonnan ta poniendo atenshon máksimo na tur parti di
e magno evento aki. Asina pues tin un komishon ku ta trahando riba proposishonnan pa hasi
partisipashon di spesialmente nos hóbennan hopi atraktivo.
Aparte di esei, tabata tin vários reunionnan importante ku a tuma lugá, pa loke ta trata
produkshon di Festival di Tumba 2025 na un nivel mas haltu.
A traha riba un plan di infrastruktura ku repartishon di e kompleho di Curaçao Festival
Center (CFC) den vários áreanan, kaminda ta krea mas fasilidat pa e públiko. Esaki lo bira
un dje puntonan ku lo bai duna Festival di Tumba 2025 un dimenshon nobo i mas adaptá na e
tempu modèrno.
Otro reunionnan importante ku a tuma lugá tabata ku esnan enkargá ku zonido i tambe ku e
komishon ku ta enkargá ku e parti di promoshon intensivo pa e evento di Festival di Tumba.
Direktiva di AMAK durante reunion general i reunion ku lidernan di banda a atendé tur punto
di atenshon di e Festival.

TIN BON INTERES PA PARTISIPASHON
E interes pa partisipá na Festival di Tumba 2025 ta grandi. AMAK a kòmbersá ku diferente
partisipante i a bisa ku nan lo no ke keda for di dicho festival. Esaki ta duna AMAK tambe e
sentimentu ku mas i mas nos músikonan i kantantenan ta bai traha riba tumbanan na nivel
hopi haltu. AMAK a risibí tambe e nostisia enteresante ku tin agrupashon musikal algun
kantante popular di Aruba i Boneiru ku tin ideanan serio pa partisipá den Festival di Tumba
2025.
E premionan ku durante Festival di Tumba 2024 a keda otorgá, lo keda igual pa Festival di
Tumba 2025 i esaki danki na e gran kolaborashon di tur e Branding Partnernan ku ta kere den
Festival di Tumba I nos artista i musikonan.
Finalmente direktiva di AMAK ta pidi tur dirigente di banda, areglista, kompositornan i
kantantenan, pa keda hasi nan preparashonnan di un forma optimal pa di e forma ei logra un
presentashon eksitoso, durante nos magno evento, ku ta Festival di Tumba 2025.
RESHAPERS TA ENKARGA KU MERKADEO I PROMOSHON “DESIGN”
Meskos ku tabata e kaso Festival di Tumba 2024, e tim e keda mesun kos. AMAK tabata tin
un bon eksperensha ku Reshapers pa lokual ta promoshon I “DESIGN” di Festival di Tumba
2024 i nan ta keda e kompania profeshonal ku ta enkargá pa mundu sa di Festival di Tumba
2025 tambe. E aña aki e dil ku Reshapers a keda realisá muchu mas trempan loke ta duna
Reshapers muchu mas tempu pa usa nan kreatividat i “expertise” i ta mucha mas dediká na
Festivald di Tumba. Por spera hopi kos diferente di Reshapers e aña aki.

TRANSMISHON 4 ANOCHI PPV I TRANSMISHON HABRI ANOCHI VIA DI NOS
PLANTANAN DI TELEVISHON LOKAL

Pa produsí Festival di Tumba ta algu hopi kostoso, pasobra mester kubri gastunan di
produkshon, dekorashon i infrastruktura. Gastunan pa organisá Festival di Tumba a subi ku
mas di 40%, i pa por kubri e gastunan adishonal, Direktiva di AMAK a tuma e desishon pa
kontinua ku e aplikashon “NOS TUMBA”. Esaki ta un plataforma di streaming di AMAK ku
tur hende ku no tin nan box di FLOW, por bah’e riba nan telefon, tablet, IPTV box, Firestick
i paga bo PPV i disfrutá di Festival di Tumba 2025. E meta prinsipal di e aplikashon “NOS
TUMBA” ta pa yuda generá mas fondo pa yuda kubri gastunan di Festival di Tumba. Na
2024 kual tabata e prome aña di aplikashon “NOS TUMBA”, e PPV via e plataforma aki
risibí mas ku 1500 abonado.
Meskos ku na 2024, tur amante di Festival di Tumba ku pa un of otro motibu no por yega
Curacao Festival Center pa presensia Festival di Tumba en persona, por sigui Festival di
Tumba 2025 via di PPV : Via e Plataforma “NOS TUMBA” (ront mundu), FLOW (area di
Kòrsou), Flamingo TV i Telbo na Bonaire i Setar na Aruba. Un transmishon di PPV muchu
mas aktraktivo, ku muchu mas tantu entrevista ku públiko i ángulonan di kamara diferente ku
bo a kustumbra ku ne. Lo tin e aña aki un total di 18 kamara pa kapta tur angulo riba e steig i
públiko tantu den Red Carpet komo General. Un transmishon PPV muchu mas diferente i
inovativo. Esnan ku kumpra nan PPV lo haña delaster un detaye mira durante e 4 anochinan
di transmishon.
E aña aki lo bai tin manera a kustumbrá e transmishon liber di Festival di Tumba riba e
anochi final, pero esaki lo ta di un otro indolé for di manera e televidente a kustumbrá kuné.
Transmishon liber riba djabièrnè lo no mira entrevistanan den publiko ni tampoko ángulo di
tur e 18 kamaranan ku lo tin den Curaçao Festival Center. Ounke ku gastunan pa produkshon
di Festival di Tumba a subi konsiderablemente, AMAK ta perkurá pa espesialmente e
fanátikonan di mas edat i ke mantené nan gastunan abou, tog tin e oportunidat pa por sigui
Festival di Tumba trankil na nan kas.
E fanátiko di Festival di Tumba ku pa un òf otro rason no por yega Curaçao Festival Center,
pero ku ke sigui tur detayes di 4 anochinan di un forma digital, nan tin e oportunidat di
kumpra PPV via e Plataforma “Nos Tumba” i FLOW kuminsando 13 di desèmber pa
solamente Ang. 99.–. E gimmick di PPV preis speshal lo ta vigente te dia 15 di yanüari 2025.
Despeus di 15 di yanüari 2025 e preis di PPV lo subi bai e preis normal di Ang. 125.–. Pa
PPV via di FLOW por tuma kontakto ku FLOW i pa e PPV via e aplikashon di “NOS
TUMBA” por kumpra esaki via Caribbean Ticketshop.com, ofisina nan di Tu y Yo i na
Smart Tech. Pa esnan ku no tin box di FLOW, pero si tin un IPTV box of Firestick, nan por
pasa libremente na Smart Tech den Saliña i asina bo kumpra bo PPV, Smart Tech lo down
load e aplikashon di “NOS TUMBA” grátis pa bo. Esaki ta un kortesia di Smart Tech i
AMAK. Kumpra bo PPV i yuda kontribuí ku nos artistanan i Festival di Tumba, risibí
ímagennan inovativo, entrevistanan ku públiko i artistanan i ku chèns di gana vários
premionan interesante. Kòrda “download” bo aplikashon di “NOS TUMBA”.

BENTA DI KARCHI DI FESTIVAL DI TUMBA

Durante reunionnan di preparashonnan intensivo ku komishon di Festival di Tumba 2025 a
tene, benta i kòntròl di karchinan di Festival di Tumba tabata un punto importante.
Despues di un análisis, Direktiva di AMAK a tuma e desishon pa kontinuá ku su akuerdo ku
e kompania Sentro di Pago Tu y Yo pa atendé ku e benta di karchi di Festival di Tumba. Tu y
Yo a hasi un ekselente trabou manera nan ta bisa na ingles “Never change a winning team”.
Sentro di Pago Tu y Yo, ku tin un kantidat grandi di puntonan di benta, lo kordiná benta di
karchi i tambe nan lo pèrkurá pa tin karchi disponibel na otro puntonan di benta manera 24
Uur uit de Muur na pòmp di gasolin Sta. Maria, Ticket Point Curaçao na Zeelandia I ESO
events (Evento Show i Otro). Miembronan di Fun Miles tambe por troka nan puntonan di Fun
Miles pa karchi General i/of Red Carpet.
Meskos ku na 2024, tur karchi lo tin su QR Code ku lo hasi e kòntròl di karchinan na porta
muchu mas fásil i efisiente. Tres informashon masha importante :
 ESO Events lo por trese bo karchi pa bo te kaminda bo ta ; djis yama of app 599-9-5260235.
 Tantu 24 Uur uit de Muur komo Ticket Point Curaçao ta duna bo chèns di paga bo
karchi di entrada di Festival di Tumba den dos pago. Pa mas imformashon por tuma
kontakto ku e dos puntonan di benta aki.
 Fun Miles ta un orguyoso Branding Partner nobo di Festival di Tumba i esaki ta e
rason ku tur persona ku tin un tarheta di Fun Miles ta haña un deskuento speshal na
momentu ku nan troka nan puntonan di Fun Miles pa un karchi di entrada di Festival
di Tumba. Si abo ta un persona ku tin bo tarheta di Fun Miles i bo ta enteresá den
Festival di Tumba, tuma konakto ku Fun Miles pa bo por troka Fun Miles i kumpra
entrada di Festival di Tumba 2025 pa bo mes of pa hasi un regalo bunita ku ne na un
ser kerí di bo.
Karchi di entrada pa sekshon General ta kosta Ang.95,– i pa sekshon di Red Carpet Ang.
355,– i ta optenibel for di 23 di desèmber na tur e punto nan di benta ariba menshoná.

DI TRES I ULTIMO GIMMICK PA KARCHI NA PREIS REDUSI
Un anunsio hopi importante ta ku djasabra dia 21 di desèmber, lo bai tin e ultimo benta ku
preis di ganga di e karchinan di festival di tumba di 10or di mainta pa 12or di mèrdia. Lo tin
un maksimo di 300 karchi general na preis redusí di Ang. 65,– i 100 karchi pa red carpet na
rason di Ang. 310,–. Sigui página soshal di Festival di Tumba pa anunsio di e lokalidat di
benta.

PODCAST “NOS TUMBA” TA KONTINUA PA FESTIVAL DI TUMBA 2025
Angelo “LA” Virginie kende ta miembro di e tim organisatorio di Festival di Tumba 2025 lo
ta e host prinsipal di e Podcast “Nos Tumba”. Na desémber 2023 AMAK a start ku podcast
“NOS TUMBA” i esaki tabata tin un akohida hopi grandi. E aña aki kuminsando djarason 12
di desèmber i seguidamente tur djarason di 6.30 pm – pa 7.15 pm, Angelo lo ta bibu for e
studio di Smart Tech pa duna informashon di Festival di Tumba 2025 i hiba entrevistanan
interesante. Sigui nos podcast “NOS TUMBA” via di pagina soshal di Festival di Tumba i via
di página soshal di Smart Tech pa bo keda na altura di tur informashon di Festival di Tumba
2025. E último fecha di Podcast “Nos Tumba”, esta dia 2 di febrüari, Angelo ku e tim di
organisashon di Festival di Tumba 2025 lo ta bibu for steich na Curaçao Festival Center.
PODCAST “NOS TUMBA” LIFE WITH MISSJD & ZAIDI
Podcast di Life with MissJD & Zaidi tabata un éksito kompletu pa loke tabata Festival di
Tumba 2024. Pa Festival di Tumba 2025 MissJD i Zaidi, dos gran fánatiko di Festival di
Tumba, lo tei bèk ku un podcast muchu mas ámplio di 4 episodio. E aña aki por sigui nan
“Behind the scenes” ora nan ta prepará pa Festival di Tumba i tambe via PPV ku nan
komentarionan durante di Festival di Tumba den Curacao Festival Center. Sigui nan riba nan
Plataforma di páginan di soshal pa bo haña mas informashon. PODCAST “NOS TUMBA”
Life ku MISSJD & ZAIDI ta patrosiná pa SMART TECH.

KLOUSURA
Komo parti final di nos informashon direktiva di AMAK ta gradisí tur branding partners,
kolaboradónan, músikonan, artistanan, areglistanan, kompositornan i abo fanátikonan di
Festival di Tumba ku ta den e preparashon pa mantené Festival di Tumba 2025 e festival di
mas grandi. Keda pendiente pa e mas informashon di Festival di Tumba 2025