Apertura di Hamelbergweg

Willemstad – Minister Charles Cooper, Ministerio di Tráfiko, Transporte i Planifikashon Urbano (VVRP), huntu ku Curaçao Medical Center (CMC), ABC Busbedrijf i Curaçao Wegenbouw Maatschappij (CWM), a realisa apertura ofishal di Hamelbergweg riba 27 di mei 2026.

Ku e apertura aki, un proyekto importante pa infrastruktura i mobilidat a yega na su final, despues di mas ku un aña di trabou intensivo. E renovashon di Hamelbergweg lo kontribuí na un mihó fluho di tráfiko, mas seguridat, i mihó aksesibilidat pa habitante, bishitante i usuario di e área.

Durante e seremonia, diferente representante di e organisashonnan envolví a duna palabra, resaltando e balor di kolaborashon entre sektor públiko i privá pa logra mehorashon duradero den infrastruktura di nos isla.

Minister Charles Cooper a gradisí tur persona i partner ku a kontribuí na e realisashon di e proyekto, i a enfatisá e importansia di sigui invertí den desaroyo infrastruktural pa benefisio di pueblo di Kòrsou.

E akto simbóliko di apertura a marka ofishalmente e re-apertura di Hamelbergweg pa uso públiko.