Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, kon ta bai atendé ku “Black-Out” nan ku pueblo di Kòrsou a eksperensia durante di e aña aki i di forma ta bai kompensá pueblo bek
Na: Presidente di Parlamento
Señora A. Pauletta
Wilhelminaplein # 4
PRESENTE
Tópiko: Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, kon ta bai atendé ku “Black-Out” nan ku pueblo di Kòrsou a eksperensia durante di e aña aki i di forma ta bai kompensá pueblo bek.
Kòrsou, 15 di desèmber 2020
Señor Presidente,
Frakshon di Movementu Futuro Kòrsou (MFK), pa medio di esaki kier pidi bo pa yama un reunion di komishon sentral mas pronto posibel ku e tópiko ariba menshoná.
Frakshon di MFK a tuma nota di e avalancha di krítikanan ku tabatin relashoná ku e diferente Black-Out nan ku pueblo di Kòrsou a eksperensia den e aña ku ta terminando aki.
Ta imperativo pa Parlamento wòrdu debidamente informá riba e motibunan i tambe posibel solushon, pa asina miembronan di Parlamento por duna nan kontribushon pa por yega na un solushon struktural i pa pueblo di Kòrsou no mester eksperensia nunka mas tantu Black-Out den un aña i sigur di e magnitut di e último Black-Out den desèmber aki.
Ta bon pa pueblo i komersiantenan ku a wòrdu perhudiká pa e Black-Out nan aki por tende di forma konkreto kon lo bai rekompensanan pa e fayonan aki den produkshon i distribushon di elektrisidat. Tambe ta bon pa Parlamento por wòrdu informá kon lo bai kompensá pueblo di Kòrsou pa e dañonan tantu material komo inmaterial ku tur e Black-Out nan aki a okashoná.
Pa e reunion aki nos ta pidi Presidente di Parlamento pa invitá Minister I.S. Martina di ekonomia i gerensia Aqualectra na e reunion aki, pa duna Parlamento e informashonnan nesesario.
Na nòmber di frakshon di MFK,
Gimar Pisas Gilbert Doran Juniël Carolina
