Minister Pisas desapuntá ku e destrukshon, A kribra pipa di awa i yena pòchinan di wc ku santu na playa Piskadó

Minister Pisas desapuntá ku e destrukshon,

A kribra pipa di awa i yena pòchinan di wc ku santu na playa Piskadó

Willemstad – Manera ya ta konosí, Minister di Asuntunan General enkargá tambe ku sektor di Agrikultura, Medio Ambiente i Naturalesa di GMN señor Gilmar Pisas, ta hasi su máksimo esfuerso pa drecha nos playanan pa nos hendenan i turista ku ta bishitá nos isla. Pero lamentablemente tin hende den nos komunidat ku no ta apresiá ku nos isla ta sigui desaroyá i bai dilanti.

Djadumingu último Ministerio di GMN a haña notifikashon ku lo tin un pipa di awa kibrá na playa Piskadó na Wèstpunt. Na yegada di personal di GMN nan por a tuma nota ku intenshonalmente a bati e pipa ku un obhento duru i kibra esaki. A mèldu e daño intenshonal aki na Minister Pisas i a derecha e pipa. Grandi tabata e sorpresa pa personal di GMN ora ku djamars nan a haña notifikashon ku lo a yena e dos pòchinan di wc na e playa ku santu. Na nan yegada na e playa, ku hopi lamento nan mester a konfirma esaki. Minister Pisas a indiká pa drecha e situashon mas pronto posibel, apesar ku ta trabounan relativamente grandi i kostoso.

Minister Pisas ta hasi un apelashon serio na komunidat pa ban stima nos pais. Tene nos isla limpi i ban respetá i kuida invershonnan ku ta wòrdu hasí riba nos isla pasobra tur esaki ta na benefisio di nos kada unu. Ta plaka di komunidat di Kòrsou ta keda invertí pa engrandesé nos isla i no ta aseptabel ku un òf dos individuo ta destruí e soño di tur pa hasi nos isla e perla den Karibe.