Reakshon riba artíkulo tokante implementashon di e lei di kalidat di airu ku a keda publiká den un korant matutino di dia 3 di yanüari 2025
Reakshon riba artíkulo tokante implementashon di e lei di kalidat di airu ku a keda publiká den un korant matutino di dia 3 di yanüari 2025
Dia 1 di yanüari 2025, a drenta na vigor e parti mas importante di e Ordenansa Nashonal, Regulashon di Kondishonnan pa Kalidat di Airu na Kòrsou, esta e normanan pa kalidat di airu na nivel di bario. Esaki ta kumpli ku un rekisito krusial di e sentensia di Korte di Promé Instansia di 19 di yüli 2022, esta ku e normanan mester ta den un Ordenansa Nashonal en bes di un regulashon ministerial.
Den e artíkulo di prensa, komo promé opservashon ta menshoná ku supuestamente un parti esensial di e Ordenansa Nashonal aki no ta drenta na vigor, esta introdukshon di un ret di instalashon pa monitòr kalidat di airu. Den e kuadro aki ta importante pa menshoná ku for di aña 2010 Ministerio di Salubridat, Medio Ambiente i Naturalesa (GMN) ta disponé di un ret di monitòr di e último teknologia ku ta midi i kalkulá nos kalidat di airu riba nivel internashonal. Na e momentonan aki e midimentu ta tuma lugá na Kas Chikitu i Beth Chaim kual ta e santana históriko di Hudiu. Den e leinan di implementashon lo regla tambe unda i kon mester midi den futuro.
E echo pues ku a posponé e “inwerkingtreding” di artíkulo 32c i 32d di Ordenansa di Molèster (na Ulandes: Hinderverordening) pa un futuro serkano lo no kambia nada na e sistema di monitòr i midimentu ku ta tumando lugá ya pa 14 aña siguí. Es mas, resientemente na luna di desèmber 2024 a tuma lugá un mantenshon anual grandi den koperashon ku téknikonan di GGD Amsterdam konforme e kontrato ku Ministerio di GMN tin ku e departamentu di kalidat di airu di GGD Amsterdam.
Pa loke ta trata e regulashon di evaluashon preskribí den artíkulo 32x di Ordenansa di Molèster, esaki lo drenta na vigor despues komo ku e evaluashon preskribí mester kubri e efektividat i e efektonan di henter kapítulo 3A – ku ta regardá e parti di Kalidat di Airu. Ta netamente pa e motibu ei a yega na e konklushon ku lo ta mas prudente pa hasi e regulashon aki momentu ku e kapítulo kompletu ta na vigor.
E Ordenansa Nashonal di eksigensianan di kalidat di airu ta transferí e kompetensianan aki for di Minister di GMN pa e Inspekshon di Salubridat Públiko, kual e nòmber nobo ku e lo haña ta Inspekshon di Salubridat Públiko, Medio Ambiente i Naturalesa. Te ora e transferensia aki drenta na vigor, e kompetensianan lo keda na vigor normal i lo keda den man di e Minister. E implementashon organisatorio di e kambionan aki ta den transkurso.
Den práktika, Ministerio di GMN ta kumpli ku e obligashonnan di informashon i raportahe bou di e Ordenansa Nashonal dor di publiká rapòrtnan di resultadonan di midimentu di kalidat di airu. Pa e resultadonan di aña kalendario 2024, esaki lo wòrdu hasí tambe pa medio di publikashon den Landscourant i di forma elektróniko.
E legislashon di ehekushon lo wòrdu entregá na stakeholders pa konsulta na kuminsamentu di e aña aki. Por último, lo tin un proseso ekstenso di komunikashon i informashon tokante e legislashon i su implikashonnan.
Riba potrèt por mira e stashonnan ku ta midi kalidat di airu na Kas Chikitu i na Beth Chaim.
