MAN-PIN ta kaba ku korupshon ku man duru

 

MAN-PIN ta kaba ku korupshon ku man duru

Sin duda MAN-PIN ta komprometé pa eradiká korupshon na tur nivel na Kòrsou. Nos vishon pa un Kòrsou próspero, ekitativo i felis ta dependé di un fundeshi di integridat i transparensia fuerte den tur aspekto di gobernashon i servisio públiko. E tempu pa medidanan mitar-mitar a pasa; MAN-PIN lo tuma medidanan desisivo i konkreto pa kombatí korupshon.

Mester bin un Kámara di Integridat ku ta polítikamente independiente, manera ta ankrá den e konsepto di lei entregá ‘Landsverordening Bureau Integriteit,’. E kámara aki ta e piedra prinispal di nos strategia kontra korupshon. Su ròl prinsipal ta investigashon di riesgonan, konseho na gobièrnu riba mitigashon di korupshon i evaluashon di progreso riba tumamentu di pasonan pa prevení korupshon. Komo parti di e aserkamentu aki lo fortalesé legislashon pa protehá individuonan ku denunsiá korupshon. E denunsianan aki ta vital pa deskubrí kasonan di korupshon i mester protehá esnan ku saka nan garganta kontra represaya polítiko.

Nos lo revisá e “Landsverordening Financiën politieke partijen” pa atendé e burakunan i ambiguidatnan eksistente den finansiamentu polítiko, den liña ku e Konvenshon di Nashonnan Uni kontra Korupshon. Esaki lo inkluí eksigí partidonan polítiko pa entregá relatonan anual, kuentanan i registronan di regalo na e Konseho Elektoral, i pa hasi e informashon aki disponibel riba nan wèpsaitnan.

Tambe MAN-PIN lo duna e poder na Parlamento pa tene gobièrnu responsabel di un manera efektivo. Esaki ta inkluí establesé time frame kla pa kontesta di gobièrnu riba preguntanan di parlamento, publikashon obligatorio di dokumentonan relashoná ku desishonnan di gobièrnu ku reperkushon pa henter komunidat i debatenan parlamentario públiko riba asuntunan krítiko. Nos lo pèrmití siudadanonan tambe pa eksigí responsabilidat a traves di petishonnan konhunto. E asuntu ku gobièrnu ta hasi i deshasí i despues splika pueblo ku mayornan a siña mandatarionan pa nò papia, mester pasa pa historia.

Den mes rosea nos lo sòru pa finansas di gobièrnu ta transparente dor di publiká relatonan finansiero regular, presupuestonan klá i deskripshonnan di gastunan komprendibel pa tur siudadano por mira. Esaki lo yuda prevení korupshon i promové partisipashon i responsabilidat públiko.

Ta importante tambe pa servisio públiko ta bon ekipá, transparente, ku hendenan kompetente i fuerte pa garantisá ku kada siudadano tin derechi riba un bon servisio. Nos lo lanta un “Bestuursacademie” pa fortifiká liderazgo y brinda profesionalisashon kontinuo pa tur ambtenar.

Ta momentu pa nos tur rekonosé ku korupshon ta mina e fundeshinan di nos sosiedat. E ta mina konfiansa públiko, stroba nos desaroyo ekonómiko i perpetuá desigualdat. MAN-PIN lo no tolerá esaki. Nos aserkamentu ta ankrá den e prinsipionan di dignidat humano, hustisia sosial, libertat, solidaridat i demokrasia. Nos lo aktua di un manera determiná pa krea un Kòrsou liber di korupshon, kaminda integridat ta prevalesé i kaminda kada suidadano por prosperá. P’esei nos ta hasi un yamada na tur siudadano pa uni ku nos den e lucha esensial aki.

Aki ta kos serio!