Otro Dia di Betico na MANA cu informacion y recreacion

Otro Dia di Betico na MANA cu informacion y recreacion

Diasabra dia 25 di januari 2025, Museo Arqueologico Nacional Aruba – MANA, lo habri pa publico di 10’or di mainta te 3’or di atardi pa bishitante di tur edad. Pa e ocasion special aki lo tin actividadnan extra manera charla, activacion di exposicion temporario y tayer.

Arkeologo Raymundo Dijkhoff lo duna e prome lectura di un ciclo di tres charla tocante e santana historico na Sta. Cruz 35. E lo elabora riba e excavacionnan cu a tuma lugar den 2001, 2012 y 2016. Lo amplia di e experiencia di e team di arkeologo y tambe di e impacto di e hayazgonan riba nos mira riba Aruba su historia. E presentacion lo ta di 11’or pa 12’ or den auditorio. Tin oportunidad pa haci pregunta y intercambia cu e arkeologo.

Bishitantenan por experencia e exposicion temporario nobo “Interlasado: Pasado Presente”, di e artista Velvet Zoé Ramos. Den e exposicion aki, cu lo sigui desaroya durante 2025, e artista ta combina dos concepto: ‘E Fiesta y Interlasado’. Pa medio di instalacion interactivo y evento publico, e exposicion ta crea un dialogo, invitando cada participante pa reflexiona riba e metafora di simia y ciclo di crecemento.

Ramos ta un artista interdisciplinario biba na Aruba. E ta explora empatia pa medio di arte di instalacion, print y video. El a participa na diferente exposicion y proyecto local y internacional. El a representa Aruba na e Mykonos Biennale 2021 y a ser selecta pa e di 19 Biennale Asiatico na Bangladesh 2022. Tambe el a ricibi e ‘Studio Caribe Film Fonds Development grant 2024-25’ pa su pelicula experimental cortico ‘Adrift’/ ‘Wak leu’.

Artista visual Jo-ann Kock – Ridderstap lo duna un tayer di ‘Healing Art’ pa tur edad. Experienciando arte neurografico por crea ‘mindfulness’ y trankilidad. E tayer ta pa tur persona cu ta desea pa explora creatividad y otro forma pa balansa bida.

E artista ta traha cu diferente medio manera verf di awa, azeta y crayons. E tayer lo ta a base di ‘first come first serve’ y lo tin dos tanda. Un lo cuminsa 10’or di mainta y e otro pa 1’or di merdia den edificio di glas na Schelpstraat prome piso. Ta pidi un contribucion di diez florin pa persona.

Den e mes un edificio parti abou Chef Orlando di Chichi Catering lo tin dushi cuminda crioyo na benta, manera cabrito stoba, sopi carni, pasaboca, y tambe bebida refrescante.

Bin pasa un Dia di Betico placentero den ambiente familiar y inspirativo na Museo Arqueologico Nacional Aruba!