BO BARIO TAMBE TA KOS SERIO

MAN-PIN PONIENDO ÉNFASIS RIBA DESAROYO DI BARIONAN

Willemstad, Kòrsou – Eks presidente di Merka John F. Kennedy a deklará: “No puntra kiko bo pais ta hasi pabo, sino kiko abo ta hasi na bienestar di bo pais”. Un di e formanan mas konkreto i efektivo pa Kòrsou progresá den korto tempu ta si kada habitante di Kòrsou dediká algu di su tempu pa sirbi bienstar di su bario. MAN-PIN a pone desaroyo di bario komo un di su puntonan di lansa. E meta ta pa pusha Kòrsou manda padilanti, di manera ku nos komunidat ta yega na un kultura fuertemente basá riba konbibensha, harmonia i kolaborashon. MAN-PIN tin plannan konkreto pa introdukshon di konseho di bario, ankrá den lei ku outoridat pa partisipá den toma di desishon i desaroyo di maneho di bario.

Den tur bario na Kòrsou tin asuntunan ku habitantenan por duna un man i yuda trese mehoransa.

Nos tur por a mir’é ku ‘little league’, kon Kòrsou a destaká riba plataforma mundial sakando kara di e komunidat di Kòrsou, danki na boluntarionan ku ta yuda duna guia na muchanan den bario, ta krea peloteronan ku awe ta te den Liga Grandi na Merka.

Tin vários habitante ku tur aña ta partisipá na aktividatnan di limpiesa pa Kòrsou i kontribuí na mantenshon di nos isla limpi. Otronan ta yuda na mantenshon di e skol den bario. Den pasado Kòrsou a konosé un kantidat grandi di bandanan musikal guitara plat for di Bándariba te Bándabou, aktuando den tur nos barionan i asina pone un fundeshi sólido ku te awe nos por disfrutá di dje. Un tempu Kòrsou a lusi masha atraktivo ku dekorashonnan kolorido i lusnan sumamente bunita i atraktivo durante temporada di fin di aña den barionan manera Santa Catharina, Julianadorp, Boka Samí, Mundu Nobo, Suffisant, Montaña, Santa Rosa i hopi mas.

Riba tereno di kultura, deporte, plantashon i krio di bestia, pero tambe den hasimentu di negoshi ku kreamentu di organisashonnan di koperativa tin trabounan interesante pa hasi ku lo yuda sigur pa Kòrsou dal pasonan gigantesko dilanti, dunando satisfakshon na gran parti di nos komunidat. T’esei ta e aktitut ku falta pa kada habitante di bario skohe pe.

Partisipashon, konbibensha, harmonia i kolaborashon mester ta aspirashon di kada gobièrnu ku ke mira Kòrsou bai dilanti. No tin espasio pa individualismo i pensamentunan totalitario kaminda un grupito so ke hasi i deshasí sin skucha bos di pueblo. No tin espasio den e Kòrsou di awe pa dividí i reina. Tin trabou pa hasi barionan tambe un kos serio!