Ministerio di SOAW ta kondená e strategia di publisidat ku ta demoralisá hende muhé

Willemstad – Ministerio di Desaroyo Sosial, Labor i Bienestar (SOAW) ta kondená fuertemente e aktividat resien di publisidat den kua hóbennan a fungi komo modelo provokativo pa promové un evento den tráfiko. E akto aki, ku a enserá e uso di nan kurpa komo material di propaganda, ta bai totalmente kontra di balornan moral fundamental i normanan di desensia. Akshonnan asina’kí no solamente ta pone dignidat di hende muhé bou di preshon, pero tambe ta kontribuí na e normalisashon dañino di demoralisashon di género den sosiedat.

Minister di SOAW, sra. Dayanara Chin-A-Lien Roozendal, ta indiká ku e “ta haña inaseptabel ku ta sigui redusí hende muhé na djis símbolonan di plaser pa propósitonan komersial òf di entretenimentu. E insidente aki ta reforsá stereotiponan antikuá i dañino ku ta disminuí e ròl importante ku hende muhé tin den nos komunidat i ta stimulá desigualdat di género”. Imágennan di hende muhé yòn, presentá di e manera aki no solamente ta falta di rèspèt pa nan mes balor propio, pero tambe ta manda un mensahe preokupante pa e siguiente generashon tokante e ròl i balor di hende muhé den sosiedat.

Ademas, hasiendo algu di e índole aki riba vianan públiko hopi transitá ta agregá un otro kapa di iresponsabilidat debí na posibel opstakulisashon di tráfiko, kousá pa distraishon inusual riba nos vianan.

Ministerio di SOAW ta ripití su posishon firme kontra kualke forma di desmoralisashon di género i ta urgi organisadónan di evento, negoshinan i komunidat en general pa rechasá práktikanan ku ta degenerá e hende muhé. Nos ta enkurashá métodonan di promoshon responsabel ku ta kuadra ku normanan étiko, stimulando di e forma aki un sosiedat ku ta balorá tur individuo di forma igual.

Den kuadro di ratifikashon i implementashon di Tratado di Istanbul, un tratado ku Kòrsou ta trahando riba dje pa por ratifiká huntu ku demas islanan den Reino, Ministerio di SOAW lo bini ku kampañanan di konsientisashon ku ta atendé netamente ku e tópiko di demoralisashon di género aki. Tratado di Istanbul ta un tratado di derechi humano ku tei pa kombatí violensia kontra hende muhé i violensia doméstiko. E tratado ta duna instrukshonnan kla den vários artíkulo, dirigí riba konsientisashon i igualdat di género. “Den kuadro di su implementashon, ministerio di SOAW lo traha sin kansa pa por debilitá e stereotiponan fuerte ku nos a permití pa krese den transkurso di añanan. Unu di nan ta demoralisashon di e ser hende muhé”, minister ta terminá bisando.