BAN KUIDA LOKUAL TA DI NOS: NOS DEMOKRASIA

 

 

BAN KUIDA LOKUAL TA DI NOS: NOS DEMOKRASIA

Willemstad, Kòrsou – MAN-PIN tin komo parti di nan ideologia e mesun prinsipionan di demokrasia, inkluso e libertatnan ankrá den nos sistema demokrátiko. Dia 21 di mart 2025 Kòrsou un biaha mas ta bai selebrá demokrasia. E derechi demokrátiko di hende pone nan mes disponibel pa keda elegí komo miembro di parlamento i vota den elekshon liber i sekreto ta ankrá den nos leinan konstitushonal. E libertat di kada hende riba nos pais pa ekspresá nan mes liber i e libertat di prensa ta vital pa funshonamentu di nos demokrasia. E programa di Vishon i Maneho di MAN-PIN ta presentá varios akshon konkreto pa fortifiká partisipashon den gobernashon di pais. Entre e akshonnan aki tin lantamentu di Koseho di Bario i konsultanan struktural riba diferente area, tur ankrá den leinan ku ta duna partisipantenan garantía ku nan bos ta konta den toma di desihon riba maneho i lei.

Ta fresku den nos memoria ku na aña 2017 kabinete Pisas I a hasi un todo por todo pa para elekshon. Danki na intervenshon di gobernador ku e elekshon a tuma lugá i pueblo por a hasi su eskoho liber. Sinembargo e tendensha di mina nos demokrasia a kue forma struktural na momentu di kabinete Pisas II a keda formá despues di e elekshon di aprel 2021. E lista di akshonnan poko demokrátiko kada dia ta birando mas largu:

• Kontrario na e gobièrnu 2017-2021, kabinete Pisas II i su mandatarionan ta pober na transparensha. Por konta riba dedenan di man e kantidat di konferenshanan di prensa di parti di gobièrnu, kaminda representantenan di media por hasi preguntanan krítiko. Ora tin enkuentro ku prensa, ta hasiendo esei pa medio di “relato di dia” sin ku prensa por hasi pregunta;
• For di inisio kabinete Pisas II, e kabinete i su ministernan a skohe pa komuniká pa medio di nan páginanan personal riba medionan sosial. Esei ta ekskluí alrededor di 30% di kasnan di famia ku no tin akseso na Internet, manera esei a bira konosí durante di e senso ku a tuma lugá na 2024.
• Un fenómeno mas, indikativo di e minamentu di demokrasia, ta e manera ku tur ku ta krítiko pa ku maneho di e ministernan enkuestion, ta keda blòkia di akseso for di social media di e mandatario;
• Mandatarionan ta dikta si ta bai i na kua momentu ta bai responsabilisá nan maneho na parlamento.
• E lista ta mas largu ainda si nota e kantidat di organisashon i miembronan di prensa i media ku a bira víktima di represaya polítiko. Resien un reportero a keda sensurá ora a imponé vakashon riba dje te despues di elekshon.
• Varios ta e emisoranan ku públikamente ta ser ataká i ekskluí di atvertensianan pagá dor di gobièrnu, ku aparentemente ke kaba ku esakinan siendo ku nan ta krea empleo pa varios hende.

MAN-PIN no por keda sin señala e gravedat di e manera ku nos demokrasia ta keda miná. P’esei, un di e akshonnan ku nos lo tuma den e promé 100 dianan di gobernashon ta entre otro organisá un kumbre nashonal kaminda tur hende i organisashon ku interes general komo nan meta por partisipá i kontribuí na e base pa un gobernashon demokrátiko. Parti di esei ta inisiá ku e konsepto di lei pa introdukshon di Konseho di Bario ku entre otro fasilidatnan pa esnan ku barionan skohe pa representá nan ta bon prepará pa dialogá ku gobièrnu i e aparato públiko. Tambe lo fortifiká partisipashon di pueblo, dor di ankra e derechi di pueblo pa entregá konsepto di lei pa tratamentu den parlamento.

Ademas, MAN-PIN lo restablesé konferensha di prensa semanal pa informá pueblo pa medio di prensa di desaroyonan gubernamental i lo hasi posibel pa mas tantu hende posibel tin akseso na servisionan di gobièrnu serka di kas den nan bario i modernisá e akseso na gobièrnu pa via digital.