AMAK I MAURICIA PICTURES PRODUCTIONS TA LAMENTÁ I TA PIDI DISKULPA PA E TRANSMISHON NO IDEAL RIBA PPV

 

Kòrsou, 4 di Febrüari 2025.

AMAK I MAURICIA PICTURES PRODUCTIONS TA LAMENTÁ I TA
PIDI DISKULPA PA E TRANSMISHON NO IDEAL RIBA PPV

Willemstad- Na promé luga direktiva di AMAK i Mauricia Pictures
Productions ta lamentá i ta pidi diskulpa na tur kliente ku a kumpra nan
PPV i tambe na Flow, Flamingo TV, Setar i Nos Tumba app ku ayera na
momentu ku e transmishon di e promé dia preliminar di festival di tumba
ku e produkshon di PPV no a funshoná manera debe ser.
Komo instansianan responsabel nos ta haña ta bon pa trese un
splikashon na tur e klientenan di e diferente plataformanan pa klientenan
ta na altura di kiko a pasa.
Un dia promé esta djadumingu 2 di febrüari den oranan di anochi
Mauricia Pictures Productions a hasi tur tèst di zonido i e parti visual pa
sa ku tur kos ta kla pa asina djaluna habri e klientenan ku a kumpra nan
PPV por ta garantisá di bon kalidat di transmishon. I mester bisa ku e
pruebanan aki a bai perfekto sin niun problema.
Awa seru e mayó kousante dje problema
Manera ta konosí Kòrsou i sigur e área di Brievengat kaminda Curaçao
Festival Center ta situa a hañé den oranan di atardi na 2 okashon ku un
palu di awa seru. Hopi awa a kai den e kompleho i esakinan tabatin
efekto kaminda awa a penetrá den algun kompartimentu kaminda
liñanan di transmishon i kabelnan di koriente ta ubiká. E esaki a resultá
den un problema kaminda señalnan a kai afó i mester a bai atendé ku
kada liña i kabelnan apart pa por a kontrolá i set up e situashon di nobo.
Aserka tambe, un server a konfrontá problema ku esaki a pone ku na
momentu ku a kuminsá manda e señalnan e klientenan tabata risibí
ímagen i bos pero ku no tabata kana pareu ku otro. Mas lat e situashon
a mehorá na momentu ku e téknikonan a restablesé e señal i zonido
atrobe.
Entretantu for di oranan di mardugá despues ku e festival a tèrminá
Mauricia Pictures Productions a kuminsá ku un revishon kompletu di e
sistema pa asina por garantisá ku awe nochi i sobra dianan di e festival
tur kliente por risibí nan transmishon limpi manera semper tabata e kaso
ku e transmishonnan di PPV.
Pa e motibu aki awe nos ta start for di oranan trempan di atardi ku e
transmishonnan for di Festival Center pa kada kliente por tin e garantia
ku nan ta risibí un bon transmishon.
Un biaha mas AMAK, Mauricia Pictures Productions ta pidi nan mas
sinsero diskulpa na klientenan i tambe , Flow, Flamingo TV, Setar i Nos
Tumba app pa loke a kontesé ayera ku e transishon di PPV i pa
kompensá esaki nos lo alargá e transmishon di PPV ku un siman èkstra
kaminda kada kliente por mira bèk un biaha mas e di 53 edishon di
festival di tumba 2025.