Detenshon relashoná ku violashon di lei di arma di kandela

KUERPO POLISIAL KÒRSOU

KOMUNIKADO DI PRENSA

9 febrüari 2025

Detenshon relashoná ku violashon di lei di arma di kandela

050/2025

Djadumingu 9 di febrüari 2025 alrededor di 02.56’or, Un unidat di U.S.T. ku tabata
patruyando den Bargestraat, duna shofùr di un vehíkulo òrdu pa para pa somet’é na un
kontròl.
Shofùr di e vehíkulo aki a trata na kore bai i a aksidentá den kurá di un kas. Despues el a
trata na bèk e pikòp ku e tabata manehá i durante di e maniobra aki a dal e pikòp kontra e
vehíkulo polisial.
E agentenan ku a yega aserka, a tuma nota ku e shofùr tabata den posishon di un arma di
kandela den su man.
En bista ku e hòmber aki por a usa e arma kontra di un agente ku tabata para serka di dje, e
kolega a lòs un tiru dirigí riba e shofùr, e hòmber J.R.C. di 19 aña di edat nasé na Kòrsou, ku
a alkansé na su pia drechi.
Na e sitio a detené e sospechoso pa violashon di lei di arma di kandela, mientras ku a
konfiská e arma ku a resultá di tabata unu di airsoft i e vehíkulo den kua e hòmber tabata.
Ku ambulans a transport’é pa poliklinika di C.M.C. pa tratamentu médiko avansá.
Un Fiskal ouksiliar a ordená enkarselamentu di e sospechoso mientras ku investigashon den
e kaso aki ta kontinuá.