Agente polisial ta mata un hoben durante persekushon
Agente polisial ta mata un hoben durante persekushon
Aruba: Alrededor di 5or di djadumingu marduga tabata tin un persekushon tras di un vehikulo Toyota Vitz komo ku e shofur tabata manehá iresponsabel i sin lus parti patras di e vehikulo. E shofur no a reakshoná riba òrdu polisial pa e stòp e vehikulo i den Madiki Kavel agentenan a lòs sigur 10 tiru riba e vehikulo ku a alkansá e hoben ku tabata tras di stür. E hoben a fayesé na e sitio.
Dòkter di polis a konstatá morto di Ayden C.J. Lanoy (19), un hoben ku a bira tata apenas algun luna pasá. Despues di a bishitá SPO Santa Cruz, e tabata traha na Save a Lot na Boegoeroei i tabata biba na Savaneta.
Segun su amigunan Ayden ta un mucha hòmber ketu, trahadó i no problematiko. Loke a pasa den marduga di djadumingu ta un misterio. Un amigu di Ayden tabata kore tras di Ayden i el a graba e persekushon. E material aki lo mester sirbi pa yuda Landsrecherche den nan investigashon.
Un di e agentenan polisial envolví den e suseso aki tabata envolví den tres insidente anterior kaminda ku tambe el a saka su arma reglamentario i a tira. El a hustifiká e uso eksesivo di poder aki pa e insidentenan anterior. Investigashon lo mester dedusí si e uso di arma den e kaso aki tambe tabata hustifiká.
Durante e persekushon, sentral di polis a duna òrdu na e patruya pa stòp e persekushon ku tabata hopi peligroso i e motibu no tabata pisa asina tantu pa e risiko ku tabata kore. Sinembargo e patruya no a sigui e òrdu aki i a kontinuá ku e persekushon ku e resultado fatal.
Komo ta trata di dos agente polisial, Landsrecherche ta enkargá ku e investigashon. E kantidat di huls ku a keda enkontrá na sitio di e insidente ta duna indikashon ku tabata trata di un kaso di bashament’i bala riba un shofur ku tabata koriendo sin lus patras i ku no a para pa polis. Investigashon tin ku dedusí si e agentenan a aktua korekto òf si tabata tin mal uso di poder òf si tabata trata di asesinato. Komo tal a kita arma reglamentario di ambos agente polisial mesora i nan por traha paden so durante e proseso di investigashon.
639114718427035"
639114718427035"