ENSEÑANSA MESTER OFRESÉ OPORTUNIDAT, DETERIORO SOSIAL PREKUPASHON GRANDI PA FUTURO DI NOS YUNAN

ENSEÑANSA MESTER OFRESÉ OPORTUNIDAT

DETERIORO SOSIAL PREKUPASHON GRANDI PA FUTURO DI NOS YUNAN

Willemstad, Kòrsou – Kurason di kabinete Pisas II no a bati pa futuro generashon ni e muchanan di awe. E reto di mas grandi i urgente den nos enseñansa aki na Kòrsou ta e kantidat kresiente di muchanan ku problema sosial manera pobresa, ambiente instabil na kas di famia i problemanan di salú mental. MAN-PIN ta rekonosé e nesesidat urgente pa atendé ku e krísis aki i ta proponé un solushonnan duradero pa sigurá ku tur mucha tin e mesun oportunidat di krese komo hende felis den nos komunidat.

Resientemente e rapòrt “Estado di Enseñansa di Fundeshi 2024” a indiká ku 2.739 alumno mester di kuido spesialisá den nos skolnan di fundeshi. Skolnan mes a indiká ku e nesesidat di remedial teacher i trahadó sosial ta grandi. Ta alarmante nota ku durante aña eskolar pasá 935 alumno tabata tin nesesidat di un remedial teacher i tin solamente 7 ta laborá den nos skolnan. Esei ta un promedio di 133 alumno pa atendé dor di un remedial teacher. Ta opvio ku esaki ta imposibel. E problemanan aki no solamente ta impaktá e muchanan mes, sino tambe ta pone un karga signifikante riba maestronan i e efektividat general di nos sistema di enseñansa.

Mucha ku ta enfrentá problemanan sosial hopi bia ta lucha pa enfoká riba nan lèsnan i hopi ta falta e guia i sosten emoshonal i sikológiko ku nan mester pa tin éksito. Falta di personal kualifiká den skol ta pone ku maestronan hopi bia tin ku dil ku e problemanan kompleho aki sin e rekurso, treining òf sistemanan di sosten nesesario na nan disposishon.

E retonan aki den enseñansa ya ta konosi for di basta tempu. Sinembargo e gobièrnu aktual a tuma dos aña pa para wak kiko ta e problemanan den enseñansa I awor den pitu bin ku mas rapòrt pa señala e problemanan ku ya kaba nos ta na altura di dje pa años.

P’esei, MAN-PIN no ke pèrde mas tempu, E programa di Vishon i Maneho di MAN-PIN:

• Intensifiká i amplia e ròl di trahadó sosial den skolnan i barionan: E akshon aki ta enfoká riba trahadó sosial profeshonal den skolnan i den komunidat pa sostené muchanan i famianan ku retonan sosial. E profesionalnan aki lo traha huntu ku maestronan pa proveé intervenshonnan adaptá i krea un ambiente di edukashon mas sigur i sostenibel.
• Servisionan di Salu Mental pa Studiantenan: Hasi servisionan di salú mental aksesibel den skolnan pa atendé ku problemanan manera ansiedat, depreshon,trauma èts. Programanan di intervenshon tempran ta yuda alumnonan dil ku e situashonnan aki mihó.
• Entrenamentu di Maestro pa dil ku problemanan Sosial-Emosional: Ekipá maestronan ku abilidatnan pa maneha klasnan ku nesesidatnan sosial diverso.
• Skol komo un lugá Sigur: Fortalesé skolnan komo lugánan sigur kaminda muchanan ta sinti nan protehá i sostené. Esaki ta enserá implementá programanan kontra bullying, krea ambiente inklusivo, i sigurá ku tur mucha tin akseso na nesesidatnan básiko manera kuminda saludabel i materialnan di skol.
• Sosten pa Famianan Vulnerabel: Desaroyá programanan ku ta proveé sosten direkto na famianan den krísis, yudando nan stabilisá i krea mihó ambiente familiar pa nan yunan.

MAN-PIN ta komprometé pa atendé ku e kousanan fundamental di problemanan sosial ku ta afektá muchanan di Kòrsou. Dor di traha huntu ku edukadornan, famianan i komunidat, nos por krea un sistema holístiko ku ta sostené tur mucha di manera igual i sigurá un futuro mas briyante pa nos isla.

Vianella Gijsbertha-Leer