Avioneta pa mucha, komo parti di Gobièrnitu na Servisio di Atmishon

Avioneta pa mucha, komo parti di Gobièrnitu na Servisio di Atmishon

WILLEMSTAD – Djamars 18 di febrüari 2025 tabata turno pa Minister di Hustisia i BPD, mr. Shalten Hato hasi otro inougurashon di otro skina pa mucha, e okashon aki na Servisio di Atmishon. Esaki ta e di 5 huki pa mucha ku ta keda introdusí, unda den ofisina(nan) di Gobièrnu, unda públiko ta frekuentá mas, ta krea un espasio edukativo pa nos muchanan tambe por siña algu mas di e servisio, tanten nan ta warda nan mayornan risibí e servisio na e departamento.

E Gobièrnitu di e okashon aki na Servisio di Atmishon, ta den forma di un avion, ku ta netamente simbolisá e avion ku den mayoria kaso a ser usa pa yega nos isla. Ta ampliamente konosí, ku 90% di klientenan ku ta hasi uso di Servisio di Atmishon, ta personanan ku ta buska un pèrmit di estadia riba nos isla. Esaki por tin hopi dokumento ku mester ser entrega òf tambe okashon ku e servisio por tarda debí ku tin hopi kliente pa ser atendé durante di nan sita. Den kuadro di e idea aki, Minister Hato a traha un huki ku weganan edukativo, pa muchanan por sinti nan mes mas kómodo na momentu ku ta bini ku nan mayornan.

E Intenshon ta pa sigui introdusí “Gobièrnitu” na mas servisio i departamentonan di gobièrnu, pa asina e mucha por kuminsá kustumbrá for di un edat chikí ku e departamentonan di Gobièrnu, ku ta di sumo importansia den kada un di nos bida. Di akuerdo ku Minister Hato, e la risibí super bon reakshon di e 4 hukinan di Gobiernitu anterior, kual ta duna su persona e entusiasmo pa sigui brinda nos muchanan e oportunidat pa hasi uso di un huki edukativo tanten nan mayornan ta okupá.