CBCS i IEDOM trahando riba akuerdo pa interkambio di dato CBCS ta yega na un kolaborashon mas intensivo ku su stakeholdernan na Sint Maarten
CBCS i IEDOM trahando riba akuerdo pa interkambio di dato
CBCS ta yega na un kolaborashon mas intensivo ku su stakeholdernan na Sint Maarten
WILLEMSTAD/PHILIPSBURG – Dato eksakto i na tempu ta esensial pa Centrale Bank van
Curaçao en Sint Maarten (CBCS) por hasi su proyekshonnan ekonómiko na un manera bon
informá i tuma desishon di maneho monetario efektivo. Ta risibí e datonan akí for di vários
stakeholder tantu na Kòrsou komo na Sint Maarten. Resientemente, rekonosiendo e
importansia di kolaborashon, personal di Divishon di Maneho Monetario, Ekonomia i Statistíka
(MPE&S) di CBCS a tene un serie di seshon ku nan stakeholdernan na Sint Maarten i a reuní ku
nan homólogonan di Karibe Franses, di Institut d’Émission des Départements d’Outre-Mer
(IEDOM). Durante e seshonnan, e representantenan di CBCS a laga e presentenan mira kon ta
kompilá, analisá i usa e informashonnan ku ta sirbi komo base pa su proyekshonnan
ekonómiko i maneho pa ekonomia di Sint Maarten.
Na e reunion ku IEDOM, a interkambiá informashon makroekonómiko di e dos partinan di e isla i
a papia tokante posibel kolaborashon entre CBCS i IEDOM. E kolaborashon akí lo permití CBCS tin
un mihó bista di e interakshon kompleho ku ta eksistí entre ekonomia di Sint Maarten i esun di
Saint Martin, i asina produsí análisis i proyekshon ekonómiko mas eksakto. Tambe, e kolaborashon
akí lo sirbi komo base pa investigashon ekonómiko den futuro, riba tema ku ta di interes spesial en
bista di e frontera úniko i habrí ku Sint Maarten i Saint Martin ta kompartí. Den e proksimo lunanan
lo firma un akuerdo di kolaborashon entre e dos partidonan.
Divishon di MPE&S ta kompilá dato ekonómiko importante, manera statistíka monetario i di
balansa di pago, ku ta sirbi komo base pa kalkulashon i proyekshon ekonómiko. Ku e datonan akí,
MPE&S ta publiká CBCS su rapòrt prinsipal di tur kuartal, Boletin Ekonómiko, ku análisis i
perspektiva ekonómiko di mediano plaso pa Kòrsou i Sint Maarten.
E Divishon akí ke sigui organisá seshon ku stakeholder riba base regular, segun ku e ta sigui refiná
i ampliá su kapasidat riba tereno di análisis i di rekolekshon di dato. Mas den transkurso di aña, lo
organisá tambe un simposio na Sint Maarten, ku lo enfoká riba e importansia di dato i statistíka, i
duna atenshon na e investigashonnan ekonómiko ku ta andando.
Willemstad, 19 di febrüari 2025
CENTRALE BANK VAN CURAÇAO EN SINT MAARTEN
