Reakshon riba informashon robes i maligno ku ke duna riba reapertura di Post-5 na Refineria

 

 

Reakshon riba informashon robes i maligno ku ke duna riba reapertura di Post-5 na Refineria

 

 

Willemstad – E ta un echo ku na e momentunan aki nos ta den un ambiente di Karnaval i na mes momentu tin un otro desaroyo importante ta tuma lugá ku ta kampaña pa elekshon pa Parlamento 2025.

 

Promé Minister sr. Gilmar Pisas, i alabes lider polítiko di MFK, a tuma nota kon hendenan di mala fé ta keda buska tur manera pa desakreditá Gabinete Pisas II.

Den un pais demokrátiko tur hende ta liber pa skohe e partido i direkshon polítiko ku e ta deseá, pero pa trose informashon di tal manera, djis pa sasia sed i vengansa polítiko, si ta hopi baho.

 

Promé Minister sr. Pisas a tuma nota kon hendenan sin eskrúpulo, ku ta bon na altura ku Post-5 ta habrí 3 biiaha pa dia, esta mainta tempran, mèrdia i atardi ora trabou kaba, tòg a bai plama informashon inkorekto bisando ku a sera porta di Refineria bèk te aki 4 aña.

Di parti 2BAYSmes a sali un komunikado ayera den kual ta informá eksaktamente ta kua ta e orarionan ku e porta lo ta habrí na Post-5.

E link na e komunikado aki ta athunto via

https://www.2bays.com/post/the-reopening-of-post-5-reflects-increased-activity-in-the-schottegat-industrial-area i tambe https://www.facebook.com/share/15yNyNXevo/

Lo bai pone un bòrchi tambe na entrada di Post-5!

 

Na ningun momentu a bisa i òf duna informashon ku a habri e porta djamars 25 febrüari 2025 pa hende bai buska trabou!

Promé Minister sr. Pisas a splika bon kla den su diskurso riba e dia di reapertura, ku tin aviso ku a sali den korant kaminda Global Oil ta buskando 320 trahadó.

A splika ku lo habri e Refineria den fase, a splika ku debí ku e Refineria a keda mas ku 5 aña será e lo tuma su tempu pa habri i tambe ku ta hasiendo tur loke ta posibel pa pone e lei i pèrmitnan nesesario na òrdu pa tur proseso por kana manera debe ser.

Gabinete Pisas II ke evitá pa kualkier grupo por hiba Gobièrnu korte pa kobra sumanan astronómiko ku por hiba nos pais na bankarota!

 

E ta hopi di lamentá tambe pa mira kon nèt e hendenan ku supuestamente ta stima hende grandi por ta plama informashon robes i maligno di e forma aki.

Hendenan ku supuestamente ta esnan ku semper ta korekto ta fomentando informashon robes i maligno, hungando ku sentimentu di nos pueblo.

 

Gabinete Pisas II a drecha kayanan ku hinter pueblo tabatin por lo ménos 10 aña ta sklama pa drecha nan, pasobra tur outo ta kibra.

Gabiete Pisas II ta drechando situashon di impuesto pa mas hende i kompanianan por kumpli ku nan obligashonnan, alabes ta eduká pueblo riba su derechonan.

Asina tin hopi área mas ku Gabinete Pisas II a, i ketu bai ta traha duru pa mehorá tur situashon ku debidamente tin mester di atenshon riba difierente área, pero falta hopi mas.

 

Pa ku Refineria, tin oumentu di aktividatnan ku e kontrakt ku a sera ku e kompanianan Global Oil i Oryx i e aktividatnan aki lo sigui krese tambe.

Nos ekonomia ta lantando kabes i asina ta sigui krea mas kupo di trabou.

 

Di parti Gabinete Pisas II, Promé Minister sr. Gilmar Pisas ta supliká, alertá i pidi nos komunidat pa no kere i tampoko konfia den e informashonnan robes ku hendenan ku mente maligno i negativo, ku ta lansa mentira infundá tur dia di nobo, djis pa sasia nan sed polítiko.

 

E lus ku Gabinete Pisas II a sende i ku ta keda briya tur dia di nobo pa halsa e kalidat di bida di nos pueblo, ta kargá ku e fé ku nos tin den nos Ser Supremo i ta e so por paga esaki!