Detenshon pa ladronisia na bich

 

Detenshon pa ladronisia na bich
Awe, djamars 4 di mart, alrededor di 10.45 or di mainta, ‘meldkamer’ sentral a risibí notifikashon tokante algun persona deskonosí ku a kaba di hòrta algun tas for di un golfkar na Te Amo bich situá na Kaya Internarshonal. Esaki mientras e doñonan tabata snòrkel. Mesora e operadó di ‘meldkamer’ a dirigí patruyanan den e direkshon. Kòrtiku despues, e patruya a sigui un vehíkulo sospechoso ku testigunan a señalá na e bich i ku probablemente e sospechoso(nan) a hui aden.

Den un kaminda di tera na altura di Kaminda Gurubu, polis a logra blòkia e vehíkulo i a bin topa e shofùr ku un montante di sèn kèsh i telefòn. Mesora a detené e sospechoso, un hòmber di inisial M.S.A.W. di 33 aña di edat pa ladronisia. Den serkania na unda kua a blòkia e vehíkulo, a bin topa ku vários artíkulo mas, entre otro tasnan, tarhetanan, pòtmòni, oloshi di man, paña, sèrbète i telefòn. Tur prosedente di ladronisia. A konfiská e vehíkulo pa mas investigashon.

Relashoná ku e kaso aki a tene dos entrada hudisial. E promé adrès tabata un kas na Kaya Rafaela i e di dos adrès tabata un kas na Kaya Gristèlchi. Aki a konfiská algun artíkulo relevante pa e investigashon. Investigashon den e kaso ta kontinuá.