Drenta Kòrsou di forma ilegal ta resultá den tragedia riba laman ganchu Ministerio di Hustisia ta lamentá ku indokumentadonan ta sigui riska bida
Drenta Kòrsou di forma ilegal ta resultá den tragedia riba laman ganchu
Ministerio di Hustisia ta lamentá ku indokumentadonan ta sigui riska bida
WILLEMSTAD – Minister di Hustisia a keda informá dor di Wardakosta ku a raportá un insidente lamentabel kaminda un lancha ku indokumentadonan a bòltu serka di kosta di Kòrsou. Den e akto aki, Wardakosta a logra di reskata un total di 10 persona te ku awor, i ta kontinua ku buskeda pa posiblemente mas persona ku tabata abordo di e lancha aki. Di esnan ku a logra reskatá a transportá e personanan ku tabata riba e lancha pa Curaçao Medical Center pa por haña tratamentu médiko nesesario. Aktualmente, búskeda ta kontinuá pa por lokalisá personanan ku posiblemente ta falta ainda den e tragedia aki. E operashon di búskeda ta envolví Wardakosta, Polis i otro kuerponan di emergensia, ku ta traha huntu pa por haña i yuda tur persona ku ta falta ainda.
Minister di Hustisia, mirando e esfuersonan a gradisí primeramente tur kuerpo di emergensia i organisashonnan ku a kontribuí na e operashon di reskate aki i ku ainda ta forma parti di búskeda di persona(nan) pèrdí. E dedikashon i esfuerso di e kuerponan ta un yudansa fundamental pa salba bida i maneho di situashonnan di krísis.
Minister di Hustisia ta ripití ku biaha pa Kòrsou den forma ilegal dor di lancha ta algu ilegal, di hopi riesgo i peligroso. E tiponan di biahenan aki ta pone bida humano na peliger di forma grave, pa motibu di kondishonnan marítimo i e falta di medida di seguridat riba e tipo di lancha nan aki. Pa e motibu aki, ta rekomendá ku tur persona ku tin plan pa biaha hasi uzo di vianan ofishal i legal. E outoridatnan ta traha pa sigurá ku tin proseduranan kla i sigur pa migrashon pa Kòrsou, i ta importante pa sigui e kamindanan ofishal pa evitá situashonnan trágiko manera esaki.
Minister Shalten Hato, komo Minister di Hustisia, pa medio di e organisashon PATH ta hasi lo máksimo pa duna asistensia na e personanan envolví riba lancha dor di slachtofferhulp i otro instansianan pa guia i sostené nan den e proseso di rekonstruí nan bida. Slachtofferhulp ta para kla pa duna apoyo sikológiko, emoshonal i práktiko na esnan ku a pasa den e situashon difísil aki. Ademas, ta tuma e paso nesesario pa investigá kiko a sosodé i kon nos por prevení ku situashonnan semehante no ta tuma lugá den futuro. Outoridatnan lo persiguí di forma penal tambe esnan ku a kometé e akto di trafikashon i/o kontrabanda di hende i lo detené esnan ku a pèrkurá pa e biahe di riesgo aki a tuma lugá.
Minister di Hustisia ta sigui mantené enfoke riba e situashon di migrashon ilegal i tin atenshon spesial pa e kaso aki. Den kuadro di esfuersonan internashonal, ministerio ta intensifiká koperashon ku otro nashonnan i instansianan internashonal pa trata ku e desaroyo aki. Entre otro, Hustisia lo ta presente na e konferensia di ECLAC (SupDivishon di Nashonnan Uni) tokante migrashon, ku lo tuma lugá den luna di mart próksimo. Durante e konferensia, lo wòrdu trata ku aktuashonnan i strategianan pa manehá migrashon den manera sigur i humanitario, i e informashon i koperashon internashonal lo ta vital pa nos polítika di migrashon lokal.
Ministerio di Hustisia lo no deskansá te na momentu ku tur paso nesesario ser tuma pa garantisá seguridat, hustisia i asistensia pa esnan ku ta afektá den e proseso aki. Minister Shalten Hato ta afirmá su kompromiso pa protehá bida humano i pa lanta konsientisashon tokante e riesgo di migrashon ilegal. Ta hopi importante pa eduká komunidat riba e peliger ku e tiponan di biahenan ilegal ta presentá i pa stimulá tur persona pa imigrá nos isla di e forma legal.
