Diseño adaptá di proyekto di desaroyo di Playa Lagun

Diseño adaptá di proyekto di desaroyo di Playa Lagun

Willemstad-  Minister di Asuntunan General enkargá tambe ku sektor di Agrikultura, Medio Ambiente i Naturalesa di Ministerio di GMN señor Gilmar Pisas, ta presentá na pueblo di Kòrsou e diseño revisá di Playa Lagun, ku ta reflehá un balansa entre renobashon, aksesibilidat i  protekshon di naturalesa.

E diseño final ta frutanan di un proseso di konsulta intensivo den kua dialogo a tuma lugá ku diferente stakeholders relevante, esaki a konsekuensia di un periodo di diskushon públiko tokante e diseño inisial, den kua a ekspresá preokupashonnan i suherensianan di e komunidat. Minister Gilmar Pisas huntu ku Ministerio di Salubridat, Medio Ambiente i Naturalesa a implementá adaptashonnan fundamental pa kubri e nesesidatnan identifiká. E esfuerso aki a duna na e diseño final un karakter mas inklusivo i auténtiko.

Un grupo di stakeholders ku ta representá interesnan diversifiká a sostené e diseño revisá, subrayando e benefisionan ku e lo trese pa tur e usuarionan di Playa Lagun.
E diseño final ta inkluí e siguiente fasilidatnan esensial:
•           un korredor aksesibel pa personanan disabilitá i mayornan ku “stroller” pa fasilitá
movishon sigur riba e playa;
•           un área dediká pa piskadónan, kaminda nan por limpia nan piská i ofresé esaki
na públiko den un manera higiéniko i strukturalmente organisá;
•           un baño nobo adaptá pa personanan disabilitá, garantisando aksesibilidat pa tur
bishitante;
•           un área komun pa BBQ, ku ta kreá un espasio ideal pa rekreo i integrashon
sosial entre usuarionan di e playa;
•           un área komun ariba kaminda usuarionan por trese nan propio stul i disfrutá di
e brisa dushi i e naturalesa fantástiko ku Playa Lagun tin di ofresé.

Minister Gilmar Pisas ta enfatisá ku e diseño revisá ta reflehá un ekilibrio entre renobashon di Playa Lagun i protekshon di su identidat auténtiko. E adaptashonnan sigur lo mehorá e eksperiensia di usuario. Ta bon pa menshoná ku e imagennan den e komunikado aki ta sirbi únikamente komo imagennan di referensia.
Ku e projecto aki Minister Gilmar Pisas ta reafirmá un bes mas su kompromiso pa sigui traha na bienestar di e pueblo di Kòrsou.