AINDA PUEBLO TA SUFRI KU MAL SERVISIO DI INTERNET

AINDA PUEBLO TA SUFRI KU MAL SERVISIO DI INTERNET

 

Willemstad, Kòrsou – Partido MAN-PIN a ripará ku ketu bai tin hopi reklamo riba mal servisio di internet. Den pasado na momentu ku e gobièrnu MFK-PNP i KEM a sinta nos a avisá minister di Tráfiko, Transporte i Planifikashon Urbano tokante un lei ku e gobièrnu anterior a laga atras pa kaba di atende ku ne. E lei aki ta sirbi pa por atendé ku kompanianan di telekomunikashon ku no ta duna klientenan servisio bon ku klientenan ta paga pe. Nos por a kòrda kon despues di nos komunikado a lanta e diskushon den media i Parlamento a yama minister Cooper pa un reunion. Sinembarho, te ainda, ketu!

 

Minister Cooper durante reunion den sala di Parlamento a bisa ku e lo bai adaptá e lei menshoná pa asigná esun enkargá kòntròl i mantenshon di e lei, i tambe e posibel sankshonan ku por tin na momentu ku un kompanianan ta den violashon di e eli. Tambe a lansa un liña 0800 kaminda por yama i duna keho ora ku tin mal servisio pa RAC tin un bista kuantu keho tin riba servisio di telekomunikashon.

 

Lamentabelmente nos MAN-PIN por a ripará ku nada mas a keda hasi apesar di ku minister a primintí ku lo kaba di atendé ku e lei aki.

 

MAN-PIN ta urgi Minister Cooper pa kaba di atendé ku e lei aki i hasi uzo di dje pa pone kosnan rekto i evita ku pueblo ta keda paga pa un servisio malu.

 

MAN-PIN: aki ta ko’ SERIO!.

 

 

Shadell  Matrono