THE EAGLES RBC ROYAL BANK INVITATIONAL

THE EAGLES RBC ROYAL BANK INVITATIONAL

WILLEMSTAD.- Klup di atletismo The Eagles ke rekordá tur skol ku awe, 11 di mart, ta delaster dia riba kua por inskribí pa e The Eagles RBC Royal Bank Invitational. E evento deportivo, ku lo reuní skolnan for di rònt Kòrsou, lo tuma lugá riba djasabra 15 di mart riba pista di S.D.K.

Ta trata di dos dia di kompetensia na SDK, 14 i 15 di mart.

 Djasabra 15 pa 5’or di atardi lo tin e karedanan di relevo eskolar,ku karedanan di 4x100m, tantu mucha homber komo mucha muhé.

Na diferente okashon durante tipo di evento asina’ki ta deskubrí talentonan nobo, ku tin e ‘speed’ nesesario pa ta aktivo den atletismo i inkluso tuma parti den kompetensianan regional.

Ademas di e kareda pa teamnan di relevo di skolnan, lo tin algu nobo: Kompetensia di ròlstul durante kua nos siudadanonan den ròlstul tambe por demostrá kon nan por move riba un speed mas haltu ku nos ta kustumá na mira nan.

Partisipashon pa e teamnan di relevo ta na un kosto abou di Fl.35,– pa ekipo. Lo tin medaya pa 1e, 2do i 3er puesto den e diferente kategorianan.

Un rekordatorio na skolnan pa awe ainda hasi nan inskripshon pa e evento di djasabra awor, ku ta di 5’or di atardi pa 9’or di anochi.

Pa mas informashon: 569-1759.