Produkshon di Nos Kuminda ta garantia pa Baha Preis di Kuminda

Produkshon di Nos Kuminda ta garantia pa Baha Preis di Kuminda

 

Willemstad, Kòrsou – Pa hopi tempu kaba MAN-PIN a bin ta enfatisá e importansia di nos sektor agropekuario di Kòrsou. Seguridat alimentisio ta keda e base pa un komunidat sano i produktivo. P’esei MAN-PIN ta boga pa tranformá nos sektor agropekuario den un pilar ekonómiko primario i kontribuí na solushon di kosto di bida, prinsipalmente preis di kuminda.

Pa e ultimo 4 aña nos por a ekperensiá un abandono total pa ku sektor agrario. E servisio di AVB (antes LVV), kaminda un mayoria trahadó klave a baha ku penshun sin un remplaso. Proyektonan enfoká riba solushon pa e sektor ku no ta keda aprobá na tempu óf manehá no na un manera apropiá, ku ta hasi esakinan imposibel pa ehekutá. E falta di atenshon pa e sektor awe ta kulminá den ousensia kasi total di hermèntnan nesesario pa kresementu di e sektor. P’esei ta neserario pa bin ku un plan integral pa atendé ku e problemanan agudo den e sektor  manera entre otro:

1. Falta di ekipo pa prepara tera pa por planta
2. Ladronisia i vandalismo
3. Priesnan kuminiente pa kuminda di bestia
4. Kachonan di kaya
5. Preisnan hustu pa produktornan
6. Método efektivo pa por piska piskanan migratorio
7. Mashin di eis pa piskadónan
8. Planifikashon di produkshon riba nivel di pais
9. Trahadónan ku konosementu na AVB (antes LVV) pa sostené agrikultornan, kriadonan di bestia I piskadonan.

Ta importante pa atendé ku e puntonan aki pa por garantisá kuminda riba mesa pa nos hendennan i kontinuidat di trabou pa tur nos produktornan, kriadonan di bestia i piskado’nan.  P’esei MAN-PIN den su programa di gobernashon lo atendé na serio ku e retonan pa ku e sektor aki. Nos lo bai enfoká riba e siguiente puntonan:

• Invershon den agrikultura, krio di bestia i peska, e plan tin komo meta pa redusí dependensia riba importashon i krea merkadonan lokal mas resiliente.
• Sostené ku supsidio (nò finansiamentu) inisiativanan ku ta oumentá produktividat, makinarianan i produktonan esensial pa modernisá produkshon, kalidat i nutrishon di produktonan lokal, mehorá distribushon lokal, garantisá preisnan hustu pa kunukeronan i promové produktonan lokal.
• Revisá preisnan máksimo pa mayorista/produktor.
• Kòntròl rigoroso riba lei kontra importashon di fruta, bèrdura i karni.
• Inkluí medidanan pa kordiná oferta i demanda.
• Enfoke riba produkshon i prosesamentu lokal ku ta generá kupo di trabou nobo.
• Pone énfasis riba formashon i krea kapasidat pa esnan ku ta traha den e sektor di agrikultura, peska i krio di bestia, spesialmente basá riba téknikanan moderno i sostenibel. Introdusi agrikultura sostenibel den edukashon eskolar. Esaki lo yuda oumentá e produktividat i abilidatnan di e trahadónan lokal.
• Promové strukturanan di negoshi kooperativo, ku meta pa enkurashá kolaborashon i inovashon.
• Baha gastunan di kuido di salú relashoná ku malesanan relashoná ku nos forma di kome.
• Kontribuí na redukshon di desperdisio asosiá ku importashon i promové práktikanan sostenibel.
• Promové práktikanan sostenibel i regenerativo ku ta redusí e impakto ambiental di produkshon di kuminda. Esaki ta inkluí minimalisá uzo di produktonan dañino i promové biodiversidat.

Salú, alimentashon i kuponan di trabou ta kos serio. Un pais ku no ta produsí su mes kuminda ta destiná na frakasá.

Saneleo Petronella