PROME MINISTER A COMPARTI ARUBA SU VISION- Y PLANNAN DI E-GOVERNMENT
Prome Minister Evelyn Wever-Croes:
Durante evento“Women and Technology: Inspiring Stories in the GCC countries”
PROME MINISTER A COMPARTI ARUBA SU VISION- Y PLANNAN DI E-GOVERNMENT
ORANJESTAD — Prome Minister Evelyn Wever-Croes actualmente ta na Nacionnan Uni atentiendo e conferencia “Commission on the Status of Women” (CSW69). Prome Minister ta representando Aruba y ta lidera e delegacion di Reino, consistiendo di Embahadora Lise Gregoire, Secretario di Estado OCW di Hulanda, Mariëlle Paul y Minister Plenipotenciario di Sint Maarten, Gracita Arrindell.
Durante e conferencia di CSW69, Prome Minister di Aruba a hiba palabra na varios evento. Uno hopi interesante tawata “Women and Technology: Inspiring Stories in the GCC Countries”, organisa pa paisnan Arabe. Aki e mandatario a comparti Aruba su vision- y plannan ambicioso di digitalisacion y e rol di e hende muhe den esaki.
Den su discurso, Prome Minister e elabora riba e impacto di hende muhe den tecnologia y innovacion y el a comparti Aruba su biahe den transformacion digital, un biahe guia pa e compromiso pa inclusion, innovacion y progreso. El a señala riba e introduccion di e-Government, cu ta un vision pa digitalisa servicionan publico y modernisa gobernacion. Ademas Prome Minister a enfatisa riba e financiamento di Union Europeo di 14 miyon euro
cual no solamente lo fortalece e infrastructura tecnologico, pero tambe lo mehora inclusion digital y siguridad cibernetico pa nos pais.
Prome Minister a agrega cu den e proximo simannan, lo publica e Change Management Plan, cu a wordo desaroya den colaboracion cu Estonia e-Governance Academy. Esaki lo habri caminda pa implementacion di un plataforma cu lo integra e sistemanan di Departamento di Registro Civil, Departamento di Integracion y Departamento di Impuesto. E meta ta pa tin mas di 30% di e servicionan gubernamental inter-operabel pa aña 2026, sigurando un prestacion di servicio mas lihe, mas eficiente y centra riba e ciudadanonan.
“Mientras tecnologia ta impulsa transformacion, liderazgo ta impulsa cambio. Aruba ta keda firme den su compromiso cu e liderazgo di hende muhe den STEM (Science, Technology, Engineering and Mathematics), gobernacion digital y innovacion. Mientras cu nos ta traha pa un futuro digitalmente mas inclusivo, nos mester sigura cu tecnologia ta empodera, conecta y eleva cada miembro di sociedad. Hunto laga nos forma un futuro caminda transformacion digital no ta djis un plan, sino un promesa di progreso pa tur hende muhe y henter mundo”, Prome Minister a expresa.
