PROME MINISTER A PARTICIPA NA E EVENTO “LEGALLY BOLD: REWRITING LAWS TO END VIOLENCE AGAINST WOMEN”
Prome Minister Evelyn Wever-Croes:
Durante conferencia CSW69 na Nacionnan Uni,
PROME MINISTER A PARTICIPA NA E EVENTO “LEGALLY BOLD: REWRITING LAWS TO END VIOLENCE AGAINST WOMEN”
ORANJESTAD – Na Nacionan Uni durante e conferencia di ‘Commission on the Status of Women’ , Prome Minister Evelyn Wever-Croes hunto cu Minister Plenipotenciario di Sint Maarten, Gracita Arrindell a participa na e evento “Legally Bold: Rewriting Laws to End Violence Against Women” organisa pa Czech Republic.
A trata di un evento unda a adresa temanan huridico pa cu abuso contra hende muhe. E topico cu Prome Minister di Aruba a trece dilanti a trata di “hate speech” y “cyber crime” contra hende muher, algo cu ta pasa hopi na Aruba.
Prome Minister durante su discurso a expresa cu como e prome Prome Minister femenino di Aruba e ta sumamente orguyoso di ta na un evento asina importante cu ta trata violencia contra hende muhe. Akinan e mandatario a splica di e pasonan cu Aruba a tuma riba e tema aki cu leynan pa protege hende muhe y mucha muhe y cu ta sigura husticia pa e victima. El a splica di e Ley di Violencia Domestico, cu ta duna un marco legal cla pa trata abuso domestico, ofreciendo proteccion, y sigurando un recurso legal rapido pa e victimanan. Otro logro grandi di pais Aruba cu e mandatario a elabora riba dje ta e lansamento di e National Gender Policy, cu ta trata areanan critico manera violencia basa riba genero, empoderamento economico y proteccion social.
Prome Minister a sigui bisa cu apesar di e logronan grandi di Aruba, e trabou no ta cla. Pa sigui combati violencia di genero, nos mester adapta nos leynan continuamente pa atende cu menasanan nobo, manera cyber-harassment y abuso online. E era digital a introduci formanan nobo di violencia cu ta rekeri solucion legal innovativo y e compromiso di nos ta pa desaroya leynan dirigi specificamente riba esaki. Pero ta importante pa fomenta un cultura di prevencion. Mester inverti den campaña di educacion y conscientisacion y pa esaki e colaboracion cu organisacionnan civil, empresanan y partnernan internacional ta esencial.
Na cierre di su discurso Prome Minister a expresa:
“Mi ta hasi un yamada na tur nacion pa uni cu nos. Ban traha hunto pa cambia y mehora leynan cu ta protege hende muhe, pone e agresornan responsabel, y crea un mundo unda tur hende muhe por biba liber di violencia. Hunto nos por construi un futuro unda no ta tolera violencia di genero y unda husticia y igualdad ta prevalece”.
