Minister Shalten Hato ta hasi apertura di Konferensia di Seguridat Aéreo na Kòrsou

Minister Shalten Hato ta hasi apertura di Konferensia di
Seguridat Aéreo na Kòrsou

WILLEMSTAD – Ayera den oranan di mainta, Minister di Hustisia, mr. Shalten Hato
a hasi apertura di e konferensia di seguridat aéreo ku ta tuma lugá ayera na
Courtyard Marriot. Durante su diskurso, Minister a mustra e importansia di
seguridat den e sektor aéreo ku ta hunga un ròl vital den e seguridat i ekonomia di
nos pais, i ku eventonan manera esaki ta krusial pa asegurá ku nos ta kontinuá den
mehorashon di nos protokòl i práktikanan.
Komo Minister mi ta orguyoso di nos kolaborashonnan kontinuo ku Curaçao Airport
Partners, inkluyendo e proyekto PATH na Aeropuerto di Hato, ku ta resaltá nos
kompromiso kolektivo pa kombatí e tráfikashon di hende. E kolaborashon aki ta
exemplifiká nos determinashon di protehá e mas vulnerabel i pa e seguridat di tur
persona den nos hurisdikshon.
Ademas, nos esfuersonan pa reforsá e protokòl entre e Brantwer di nos aeropuerto i
tambe nos Brantwer Kòrsou ta mustra klaramente e espíritu di kolaborashon ku ta
esensial pa ataká e desafio kompleho ku nos ta enfrentá den siguridat aéreo. Huntu,
nos a logra pasonan signifikante, pero semper tin mas trabou pa hasi, i mi ta
entusiasmá pa e futuro inisiativanan ku nos lo sigui hasi, no solamente ku CAP pero
tambe otro kompanianan. E konferensia di seguridat aéreo aki ta netamente pa
stimulá diskushon profundo riba e asuntunan krusial ku ta afektá e siguridat aéreo.
Nos tin un lista di tópikonan atraktivo ku ta vital pa nos mishon pa fortalesé e
medidanan di seguridat i kultivá un kultura di vigilansia den nos industria.
Mi ta stimulá kada un di e partisipantenan na e konferensia aki pa envolví boso mes
den e seshonnan i diskushonnan. Bo partisipashon aktivo ta esensial, pasobra e
konosementu ku nos ta kompartí awe lo empoderá nos tur pa fortalesé nos mishon
kolektivo. Laga nos tuma bentaha di e oportunidat ku CAP ta ofresé nos pa siña di
otro, kompartí nos eksperensianan, i inspirá otro pa yega na altura nobo den e
seguridat aéreo!