Seremonia Florin Karibense 31 mart 2025

Bon dia na tur presente riba e dia tan speshal aki,
Pa mi ta un plaser pa por ta akinan awe na nòmber di Gobièrnu di Kòrsou riba e momentu
históriko aki, kaminda nos ta tuma despedida ofisial na un moneda konosí – e florin Antiano –
i ta yama bon bini na nos moneda nashonal nobo: e Florin Karibense.
E momentu aki no ta solamente un kambio tékniko di un biyete pa un otro. E ta marka un
kapítulo nobo den nos historia monetario. Primeramente ta un símbolo di e union monetario
ku nos hermana isla Sint Maarten i alabes e konfiansa ku nos tin den nos mes i den nos futuro.
Mi ke gradisí tur persona ku a kontribuí di un manera òf otro na e proseso aki, pa asina hasi e
florin Karibense un realidat. Espesialmente mi ke gradisí Banko Sentral di Kòrsou i Sint
Maarten ku a guia e proseso aki ku diligensia i determinashon. Bosnan ròl den e proseso aki
tabata fundamental. Spesialmente mi ke gradisí e team ku t’e dia di awe a traha
inkansablemente riba e introdukshon di e florin Karibense. Boso trabou meresé
rekonosimentu. Preparashon di e biyete nobo, kordinashon ku kompanianan ku ta imprimí,
kordinashon ku diferente sektor den e union monetario, adaptashonnan nesesario ku mester
a wòrdu hasi na por ehèmpel nos ATM-nan, kampaña di informashon – en fin, hopi trabou ku
mi tin sigur tabatin nan desafio ku nan. Pero awe, nos por para akinan ku orguyo i wak e
resultado.
Introdukshon di e florin Karibense no ta solamente un transishon di un moneda pa otro, pero
tambe un desishon simbóliko i stratégiko. Simbóliko, pasobra un moneda nashonal ta bisa hopi
di e identidat i outonomia di un pais. I stratégiko, pasobra e momentu aki ta ofresé nos e
oportunidat pa reforsá nos sistema di pago i reafirmá e konfiansa den nos infrastruktura
finansiero.
Ku e moneda nobo aki, nos ta pone den sirkulashon un moneda moderno, fleksibel i sigur. E
biyete nobo a wòrdu diseñá ku e teknologia mas moderno pa ku seguridat, kual ta redusí e
riesgo di falsifikashon i ta yuda stimulá konfiansa den nos sistema monetario.
Un punto importante tambe ta ku Kòrsou i Sint Maarten a tuma e paso aki konhuntamente.
Den un tempu kaminda kolaborashon entre paisnan rònt mundu ta bou di preshon, ta
atmirabel kon nos nashonnan komo partner den un union monetario a asumí e responsabilidat
huntu pa por tuma e paso aki.
Den mi diskurso anterior, mi a menshoná e importansia di seguridat i konfiansa, espesialmente
ora ta trata di un moneda nashonal. Awe mi ke pone énfasis riba otro benefisionan ku e
introdukshon di e florin Karibense ta trese ku n’e. E introdukshon di un moneda basá riba
teknologia moderno ta krea posibilidat pa, a largo plaso, redusí e gastunan di produkshon,
distribushon i maneho di moneda, lo kual ta kontribuí na un sistema di pago mas efisiente. Na
mesun momentu, un moneda nobo generalmente ta hasi nos mas konsiente di su balor i su ròl
den ekonomia. Tambe mi ke pidi na un i tur, pero spesialmente Banko Sentral, pa nos hasi uso
di e momentu aki pa stimulá edukashon finansiero den nos komunidat.
Ounke awe nos ta huntu aki nan pa un selebrashon, e introdukshon di un moneda nobo no ta
un fin, si no un kuminsamentu. E periodo ku ta bini aki ta esensial. Nos mester sigurá ku tur
sistema ta bon adaptá, nos komunidat ta i lo sigui wòrdu bon informá, i ku tur instansia ta sigui
e prosedura di transishon. Un apelashon pues ta bai na Banko Sentral pa nan sigui monitoriá
e proseso aki i sigurá ku e transishon pa e florin Karibense ta tuma lugá na un manera
transparente i responsabel.
Mi ke hasi uzo di e momentu aki tambe pa enfatisá ku nada no a kambia dor di e introdukshon
di e florin Karibense. Kiko mi kemen ku esaki? E florin antiano a ser sustituí pa e florin
karibense, pero esaki lo no tin ningun implikashon finansiero. Por lo tantu mi kier hasi un
apelashon na un i tur pa no hasi mal uso di e okashon aki pa oumentá preis. Mi kier hasi un
apelashon na MEO i fundashon pa kunsumidó pa yuda Banko Sentral vigilá e proseso aki pa
evitá ku mal uso lo por ser hasi ku introdukshon di e moneda nobo aki.
Pa kulminá, mi ke remarká ku e florin Karibense ta mas ku un medio di pago. E ta un promesa.
Un promesa ku nos tin konfiansa den nos mes, ku nos ta aspirá stabilidat, transparensia i
konfiansa pa un futuro mas duradero. Un promesa na e generashonnan binidero, ku nos ke
fortifiká e fundeshi di nos ekonomia. Esaki lo tin su impakto positivo pa nos klima di
imbershon i konsekuentemente pa kresementu ekonómiko.
Na nòmber di Gobièrnu di Kòrsou mi ke gradisí boso tur pa boso kontribushon, boso esfuerso
i boso dedikashon. Mi ta sinti mi orguyoso di por forma parti di e momentu históriko aki huntu
ku boso.
Masha danki pa boso atenshon.