Deportista Hubenil Maskulino

Deportista Hubenil Maskulino

 

Brayden Bridgewater.

Aki ta trata di un di nos kabayistanan hopi hóben, kende a brasa e deporte di paso fino.

Su dedikashon na e deporte aki ya for di den trempán a duna hopi bon resultado riba nivel internashonal i klaro ku awor tur hende ta pendiente pa sigui su desaroyo den e deporte.

Den aña 2024 Brayden a tuma parti na diferente kampionato nashonal i kada bes ku resultado komo nr. 1 den su kategoria. Esaki a habri kaminda pa e bai Ekitashon Mundial den kategoria di 9 pa 11 aña. Tabata un eksperensia inolvidabel, aun mas tantu si tene kuenta ku el a optené medaya di plata na e nivel aki.

Zion Sambo

Zion a proba su mes komo un atleta eksepshonal i un berdadero kampion. E ta un dje atletanan mas talentoso di Kòrsou i prueba di esaki ta su kosecha di 12 medaya di oro, 5 plata i 1 bròns. Tambe e hecho ku el a pone dos rèkort nashonal di sprint pa Junior: 100m sprint ku tempu di 10.63 sekònde i 300m sprint, tambe den tempu rèkort di 35.77 sekònde.

Riba plataforma karibense, Zion a bai Carifta na Grenada kaminda tantu riba 100 i 200m e ta finalisá komo nr. 4. Ku e prestashon aki e ta move pa Hulanda, titulá kampion hulandes Junioren riba 100m i ta risibí invitashon di federashon hulandes di atletismo pa forma parti di delegashon di Hulanda pa Kampionato Europeo Junior na Slovakia. Aki e ta kubri e distansia di 100m den tempu di 10.89 sekònde.

Tambe Zion, despues di 24 aña den kategoria U-17 a kibra rèkòrt di Churandy Martina.

Damir Francisco

Aña 2024 a kuminsá bon i a finalisá hopi bon pa Damir den e deporte di karate. El a habri e aña ganando 2 medaya di oro den luna di yanüari. Esaki tantu den kategoria di Kumite (pelea) komo Kata (demostrashon di téknika).

Su siguiente luna den Kampionato “ABC i Surnam”, Damir ta ripití ku dos medaya di oro. Despues den luna di yüni el a titulá kampion di Kòrsou den su kategoria i tambe kampion di Karibe den kompetensia ku a konta ku partisipashon di 10 pais. E ta klousurá 2024 komo kampion di torneo stimulans, demostrando ku un deportista por yega hopi leu ku disiplina, kuido físiko i rèspèt pa su deporte.

 

Deportista Senior Femenino

 

Ronnely Vos

 

Ronnely Vos ta dje deporte di tènis di mesa, popularmente konosí komo pinpòn. Durante di 2024 Ronnely a konsagrá su mes komo e dama mas éksitoso dje federashon, ku hopi bon resultado den kada un dje kompetensianan na kua el a partisipá.

 

Den Kampionato di Kòrsou, Ronnely a konkistá e honor máksimo den kompetensia individual, miéntras ku tambe den dòbel femenino el a forma pareha ku Mayra Keli i nan a bai ku e título máksimo.

Mas aleu el a hunga dòbel miksto huntu ku Dimitri Leon i e pareha a finalisá komo sup kampion di Kòrsou.

Ronnely su dedikashon na e deporte i su resultadonan, sin duda algun lo yuda pa hasi e deporte aki mas popular bou di hóbennan femenino.

Ashanty Alexandre mihó konosí komo Ashan ta “shortstop” i kapitan di su ékipo di sòftbòl Souax. Ashanty tabata e figura krusial pa su ékipo konkistá nan promé título komo kampion máksimo di sòftbòl nashonal.

 

Ashan ta un lider ku riba su mes ta organisá training di bateo pa su ékipo. Su posishon di “shortstop” a resultá di ta krusial pa e título di Souax. Ádemas di su abilidat defensivo, Ashan durante di temporada regular a bati pa promedio di .260, OBP di .415 i un porsentahe haltu di fildeo di .920.

 

Den “playoff”, el a krese i bira aun mas mihó ku promedio di .375, OBP di .583 i porsentahe di fildeo perfekto di 1.000. Ashan su kapasidat pa mantené kalma bou di preshon i su konsistensia na bate a hasi’é un hungadó kompleto i un lider inspiradó pa su ékipo kompletu.