Den Haag – Durante un Dialogo Diplomátiko inspirador riba djamars 22 aprel 2025, Kòrsou un biaha mas a keda posishoná komo un forsa pa konekshon den region. Organisashon di e summit tabata den man di Gabinete di Minister Plenipotensiario i e Ministerio pa Desaroyo Ekonomiko di Kòrsou.E enkuentro a tuma lugá komo un kontinuashon di e éksitoso konferensianan ‘Curaçao Connects Ambassadors Conferences’ di 2024 i 2025.

Minister Plenipotensiario di Kòrsou na Hulanda, Carlson Manuel, a habri e anochi ku un yamada fuerte pa kooperashon internashonal. Den su rol komo Minister Plenipotensiario, el a trese den 2024 i 2025 mas ku 56 embahador for di henter mundu na Kòrsou. Durante e edishon aki di ‘Diplomatic Dialogue’, mas ku 26 embahador personalmente a partisipá i tabata presente. Esaki un biaha mas ta subrayá e gran sosten internashonal pa Kòrsou.

Sr. Manuel a deklara ku ningun pais ta ni muchu chikí ni muchu grandi. Den e mundu di awe – kaminda tenshonnan geopolítiko, kambio klimátiko, desigualdat ekonomiko i disrupshon teknológiko ta krusa otro – ningun pais por sobrebibi si e ta su so. Sr. Manuel a bisa ku mester kooperá ku otro, no pa karidat, sino pa nesesidat. El a splika ku progreso berdadero ta surgi pa medio di kooperashon, skucha e realidat di otro i kreá solushonnan konhunto ku ta na benefisio di nos tur. Kooperashon no ta un luho, e ta un rekisito i un mester. E mandatario a splika ku Kòrsou ta dispuesto pa ta tantu un partner komo un brὺg.

Despues a sigui e diskurso di apertura di minister enkargá ku Desaroyo Ekonomiko, señor Charles Cooper, ku a subrayá e rol di Kòrsou komo un partner stratégiko. El a menshoná oportunidatnan konkreto den e área di energia bèrdè, ekonomia blou, agrikultura sirkular, turismo sostenibel i tambe industrianan kreativo.

Señor Cooper den su diskurso a bisa ku Kòrsou no ta buska sosio den teoria, sino sosio ku ta tuma akshon. Ela sigi bisa ku e embahádanan ta brὺg pa oportunidatnan nobo. Empresarionan di Kòrsou, studiante i industrianan kreativo ta kla pará pa krusa e brug ei.

Durante un seshon interaktivo yamá ‘Conversation Card Session’, dirigi pa sra. Vanessa Toré, embahadornan i representantenan di organisashonnan internashonal a interkambiá entre otro tokante desaroyo sostenibel, inisiativanan konhunto i aliansanan kreativo.

Na final, a duna un bista den futuro riba varios evento internashonal kaminda Kòrsou ta hunga un rol aktivo, inkluyendo ‘Caribbean Climate and Energy Conference’, ‘Curaçao International Investment Summit’, i ‘International Medical Conference Curaçao’.

Konforme señor Carlson Manuel, e diálogo aki ta mustra ku diplomasia no ta solamente asuntu di palabra, pero mas bien ta trata di tuma pasonan konkreto ku ta kontribuí na un mihó futuro pa nos tur.