Sin eksepshon, Kranshi ta duna servisio igual na tur siudadano

Sin eksepshon
Kranshi ta duna servisio igual na tur siudadano
Willemstad – Departamento di Asuntunan Públiko esta Kranshi ta informá nos
komunidat tokante kalidat di servisio ku e ta duna na pueblo en general. E servisio ku
Kranshi ta brinda no tin karakter di preferensia pa niun persona partikular. Esaki pa
motibu ku Kranshi ta sigui instrukshon ku ta establesé pa maneho i pa lei.
Kranshi a tuma nota di un artíkulo ku a keda publiká den un medio di prensa djabièrnè,
25 di aprel 2025. E artíkulo ta menshoná ku Kranshi lo ta duna servisio selektivo ku
karakter preferensial. Departamento manera Kranshi i otro departamentonan di e
ministerio di Maneho di Gobernashon, Planifikashon i Servisio Públiko ta keda ouditoriá
regularmente pa mantené i mehorá kalidat di e servisio ku ta brinda na komunidat di
Kòrsou. Esaki ta enserá ku tur kliente sin eksepshon ta keda sirbí ku e mes atenshon.
Prosesonan i proseduranan ta deliñá klaramente pa siudadanonan haña e mesun trato
en general. Tambe e departamentonan aki ta hiba un supervishon kontinuo pa garantisá
un servisio na nivel mas tantu posibel. Asina aki por halsa e satisfakshon di e
siudadano di Kòrsou.
Den pasado Kranshi a tuma nota den sierto kasonan ku a hasi mal uzo di sierto
produktonan ku e departamentonan ta ofresé, dor di duna mal informashon i òf entregá
dokumentonan ku no ta kuadra ku realidat. P’esei na momento ku Kranshi a konstatá
esaki, a kuminsá kontrolá sierto dokumentonan mas severo ku kisas por a krea e
pensamentu ku e departamento lo ta duna servisio selektivo ku karakter preferensial,
pero esaki no ta e kaso.
Empleadonan di Kranshi ta hasi nan trabou di kontrolá debidamente tur dokumento
kuidadosamente segun regla, pa evitá ku despues Kranshi tin un registrashon ku no ta
korekto. Pues den Kranshi no tin espasio pa niun tipo di deskriminashon, trato selektivo
òf preferensial na ningun persona. Si kualke empleado públiko na Kranshi skohe pa
duna e tipo di trato den e forma aki, lo no duda pa tuma medida disiplinario kontra dje.
E registro prinsipal di un pais mester keda konsiderá esun mas importante tur momento
i esaki ta e kaso na Kranshi. Kontrolnan severo di dokumentonan ta tuma lugá tur
momento ku por ta parse inkumbiniente pa e kliente. Sinembargo no mester saka e
konklushon ku tin un atenshon preferensial pa ningun grupo òf nashonalidat. Ku e
splikashon amplio aki Kranshi ta spera di a aklará informashonnan robes ku ta sirkulá
den nos komunidat.