KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

INdiKU – Kurso di Kapasitashon

Diferente kurso pa sektor kultural

Bon Bini Center — Ministerio di Enseñansa, Siensia, Kultura i Deporte (ESKD) ta sigui ku e trayekto di refuerso di kapasidat. Den luna di Mei 2025 tin kuater entrenamentu riba programa, dirigí riba liderazgo, búskeda di fondo pa proyekto, presupuesto di proyekto i merkadeo den e sektor kultural.

Ministerio di Enseñansa, Siensia, Kultura i Deporte su Sektor di Kultura i Deporte ta reforsá e sektor kultural di Kòrsou ku e trayekto di formalisashon di e fundashon di Instituto Nashonal di Kultura i trayekto pa fortifiká kapasidat. Esaki ta e siguiente kursonan

Djasabra 3 di mei – Liderazgo den e sektor kultural Entrenadó: Kurt Schoop

Orario: 08:30 – 12:30

Liderazgo ta hunga un papel klave den tur organisashon, sigur den e sektor kultural kaminda vishon, kolaborashon i sosten ta sentral. Den e seshon interaktivo aki lo trata diferente estilo di liderazgo, inkluyendo hèrmèntnan práktiko pa profeshonalnan kultural. E entrenamentu aki tin komo meta pa yuda partisipantenan operá mas efektivo den nan organisashonnan òf proyektonan.

Djarason 14 di mei – Introdukshon na Buska Fondo Entrenadó: Kurt Schoop

Orario: 18:30

Buska fondo ta esensial pa realisashon di proyektonan kultural. E presentashon aki ta ofresé un bista riba e prinsipionan básiko di buskedá fondo: kon bo ta identifiká finansiadónan, kon bo ta strukturá un aplikashon, i kon bo ta komuniká e balor agregá di bo proyekto di un manera konvinsente.

Djasabra 17 di mei – Traha un presupuesto di proyekto Entrenadó: Michenou Welvaart

Orario: 14:00 – 18:00

Un presupuesto kla i realisabel ta esensial pa tur proposishon di proyekto éksitoso. Durante di e entrenamentu  aki partisipantenan lo siña kon pa tradusí nan ideanan di proyekto den un presupuesto strukturá ku metanan realístiko.

Ministerio di Enseñansa, Siensia, Kultura i Deporte (ESKD) resientemente a tabata tin un evento di inaugurashon pa Instituto Nashonal di Kultura (INdiKU), un instituto ku tin komo meta protehá, reforsá i stimulá aktivamente e herensia kultural di Kòrsou.  Relashoná ku e evenementu aki, OWCS ta kuminsá e trayekto intensivo pa reforsá kapasidat, dirigí riba desaroyá INdiKU mas aleu i sostené su partnernan. E trayekto aki tin komo meta pa krea un base sólido pa un instituto nashonal di kultura ku por sostené, konektá i representá e sektor kultural di forma efektivo den futuro. Durante di e trayekto lo trata diferente tema, entre otro:  Búskeda di fondo pa proyekto kultural, Traha presupuesto di proyekto, Liderazgo den sektor kultural, Prinsipionan básiko di merkadeo, Strategianan di media sosial,  Ekonomia kultural, Komunikashon interkultural

E entrenamentunan i seshonnan interaktivo aki lo ser guiá pa eksperto i profeshonalnan den e ramo kultural, tantu lokal komo internashonal. ESKD ta konsiderá e trayekto aki komo un parti esensial di e formalisashon di  INdiKU  i e refuerso di e infrastruktura kultural di Kòrsou. E programa kompleto di e trayekto pa reforsá kapasidat lo ser  kompartí pronto via di e kanalnan di ESKD i INdiKU. Pa mas informashon por tuma kontakto ku: Aisha Gijsbertha-Leer via WhatsApp +599 9 516 6973 òf mail Aisha.leer@owcs.gov.cw of klik pa registrá Inskripshon:

Inskripshon: https://forms.office.com/pages/responsepage.aspx…

 

 

Leave a Reply

This site uses Akismet to reduce spam. Learn how your comment data is processed.