Premio Cola Debrot a keda otorgá na sr. Gregory Elias

Premio Cola Debrot a keda otorgá na sr. Gregory Elias

WILLEMSTAD – Premio Cola Debrot a keda otorgá na sr. Gregory Elias pa su trabounan meritorio ku e ta hasi den e ramo di músika pa pais Kòrsou. Minister di Enseñansa, Siensia, Kultura i Deporte sr. Sithree van Heydoorn den representashon di Gobièrnu di Kòrsou a hasi entrega di e boton ku ta un laraha di oro i Presidente di Konseho Kultura Kòrsou sr. A. Pichardo a hasi entrega di e Sertifikado (Oorkonde Premio Cola Debrot).  E premio di e montante di 5 mil Cg., riba petishon di Sr. Gregory Elias a keda entrega na Fundashon Vírgen di Rosario komo un donashon pa e trabou ku e fundashon ta hasi pa nos grandinan.

Premio Cola Debrot ta un premio riba tereno kultural ku for di 1968 Gobièrnu di Kòrsou ta otorgá anualmente na un persona òf organisashon ku a hasi trabounan meritorio. Kada aña un kategoria ta na turno pa risibí e premio. E kategorianan ta: arkitektura, arte visual, baile, folklor, literatura, músika, teatro i siensia.  Konseho Kultural ta e órgano ku Gobièrnu a apuntá pa skohe ganadornan di premionan prestigioso manera Premio Cola Debrot y Premio Boeli van Leeuwen na baluartenan di nos pais. Konseho Kultural na su turno ta forma un komishon di eksperto riba e materia partikular pa asina evaluá tur e diferente kandidatonan y presentá un ganador na Gobièrnu. E aña aki, e área di Músika a yega na remarke i e kuerpo hurado tabata konsistí di Sr. Hershel Rosario, Sr. Kevin Carty, Sr. Pernell Saturnino i sr. Andre Picardo.

E premio a keda otorgá na sr. Elias komo empresario pa su trabou meritorio manera músiko y produktor di músika ku a sa di pone Kòrsou riba mapa mundial dor di por ehèmpel organisá festivalnan di taya mundial aki na Kòrsou.

Sr. Elias pa medio di su Fundashon Bon Intenshon aparte di organisá Curaçao North Sea Jazz Festival,  Blue Seas Festival, tambe ta organisá konsiertonan ku ta honra nos baluartenan musikal manera: Macario Prudencia, Doble R, Rudy Plaate, Chin Behilia, Mafalda Miguel, pa djis menshoná un par. Sr. Elias ta sòru pa un orkesta sinfóniko ku areglonan di maestronan lokal manera Randall Corsen, Dennis Aalse i mas. Nan ta toka e piesanan di e baluartenan aki pa asina músika di Kòrsou haña un realse internashonal.

Tambe sr. Elias pa dékadanan largu a produsí artistanan tantu lokal komo internashonal. Sr. Elias mes a yega di skibi y produsí músika. Hopi biaha patras di kortina i na un manera ketu i sin ningun benefisio Sr. Elias ta yuda organisashonnan ku ta enbolbí ku músika manera “Cultureel Centrum Curacao”, Curaçao Youth Orchestra i otro organisashonnan ku ta siña nos hóbennan músika. E vishon di Fundashon Bon Intenshon, ta pa trese bienestar sosial na Korsou pa medio proyektonan di músika (tantu lokal komo internashonal), deporte i arte ku e mira pa desaroyo di nos hóbennan. Ku e vishon aki i dedikashon, Sr. Elias su fundashon ta pone medionan disponibel i tambe esfuerso personal pa sigui engrandesé Kòrsou i su músika.

P’esei, Gobièrnu ta agradesido pa su aporte balioso, spesialmente pa loke ta trata konservashon di nos músika úniko den Karibe. Minister di ESKD sr. Sithree van Heydoorn a yama e komishon danki pa nan tremendo trabou na nòmber di Gobièrnu, meskos Minister a yama sr. Elias danki pa su aporte balioso na nos pais den e ramo di músika.

—

KOMUNIKASHON

Ministerio di enseñansa, Siensia, Kultura i Deporte

* riba potrètnan athunto por tuma nota di e entrega di Premio Cola Debrot 2025