Pa monitoriá tendensia riba merkado di real estate CBCS i Kadaster di Sint Maarten ta lansa Property Price Index
Pa monitoriá tendensia riba merkado di real estate
CBCS i Kadaster di Sint Maarten ta lansa Property Price Index
Willemstad/Philipsburg – Centrale Bank van Curaçao en Sint Maarten (CBCS), den
kolaborashon ku Kadaster di Sint Maarten, a lansa ofisialmente e Property Price Index (PPI)
dashboard pa Sint Maarten. E instrumento online akí, fásil pa usa, ta monitoriá e desaroyonan
riba merkado di real estate (o sea propiedat inmóbil) na tur parti di e isla. E datonan ku e
aplikashon akí ta ofresé ta hasi posibel pa tantu persona individual, negoshi, stipuladó di
maneho komo investigadó por tuma desishon bon informá. E PPI ta disponibel riba wèpsait di
CBCS1 i Kadaster Sint Maarten.
E índise PPI ta un instrumento balioso pa un i tur ku ta interesá di kumpra, bende òf analisá
merkado di real estate. Pero su propósito prinsipal ta di yuda CBCS evaluá ki efekto e tendensianan
riba tereno di real estate por tin riba stabilidat finansiero, i detektá posibel riesgo na tempu, pa di e
manera ei yuda mantené konfiansa den sistema finansiero di Sint Maarten.
Merkado di real estate ta mas ku solamente kas, ofisina i apartamento. E ta representá un faktor di
riesgo supstansial pa sistema finansiero di e pais. Na desèmber 2024, hipotek a representá 64,4
porshento di tur fiansa pendiente den sektor finansiero lokal di nos union monetario. Esei ta nifiká
ku kualke kambio rápido den preis di propiedat, sea ku ta oumento òf kaida di preis, por tin efekto
indirekto riba e institutonan finansiero, ekonomia i bienestar finansiero di hende individual. PPI ta
monitoriá e tendensianan akí pa detektá kambio for di trempan. Di e manera ei, e ta sirbi komo un
sistema di alerta trempan ku lo permití CBCS intervení na tempu i evitá ku un riesgo asina ta plama
i bira sistémiko.
E dashboard PPI ta duna un bista di e preisnan promedio i mediano di merkado di real estate na
Sint Maarten, pa tereno (ku òf sin edifisio) i derecho di apartamento. E ta mustra tambe e volúmen
di benta di real estate i di hipotek den e ocho distritonan di Sint Maarten. CBCS ta kompilá i analisá
e índise akí a base di e datonan di transakshon ku e ta risibí di Kadaster St. Maarten, e registradó
ofisial di propietario di real estate na Sint Maarten. Aktualmente, e datonan ta kore di 2016 te mart
2025 i nan ta ser aktualisá kada kuartal2.
1 https://www.centralbank.cw/statistics-dashboards/dashboards/real-estate-market-sint-maarten
2 CBCS ta enfatisá ku e informashon mustrá den e dashboard PPI ta pa propósitonan di informashon general
so i no mester wòrdu usá komo un sustituto pa ningun forma di konseho.
CBCS lo sigui ku e trabounan pa desaroyá un dashboard PPI similar pa Kòrsou tambe. E
inisiativanan akí ta sigui mustra CBCS su kompromiso kontinuo pa yuda merkado tuma desishon
bon informá, i kontribuí na stabilidat finansiero duradero pa nos union monetario.
Willemstad, 5 di mei 2025
CENTRALE BANK VAN CURAÇAO EN SINT MAARTEN
