Sra Nadya Nersicio direktora nobo di Gobièrnu su departamentu di rekurso humano!

Nadya Nersicio

 

Sra. Nadya Nersicio ofisialmente direktor di Rekurso Humano i Desaroyo di organisashon di Gobièrnu di Kòrsou

 

 

WILLEMSTAD.- Djárason último sra. Nadya Nersicio ofisialmente a keda nombrá komo direktor di organisashon di Maneho di Rekurso Humano i Desaroyo di organisashon di gobièrnu di Kòrsou. Esaki despues di a fungi komo direktor suplente pa un largu tempu di e organisashon aki. Durante un resepshon ameno minister Shalten Hato (BPD) den presensia di koleganan, tabatin e gran honor pa hasi entrega di e dekreto gubernamental i e nombramentu ofisial ariba menshoná.

 

Nadya Nersicio después di a kuminsá na Landsloteriij na aña 1994, a drenta den servisio na CBPZ (directie POICT), komo un kandidato di HAVO den e departamento di archivo. For di e momentu ei, Nadya a demostrá un dedikashon i pashon  pa su trabou. Su deseo pa siña i krese a yuda pa e logra éksito den su karera.

 

Nadya a kontinuá su desaroyo profeshonal dor di studia na nos universidat Nashonal, kaminda el a haña su título di “meester in de rechten”. Su ekselensia i liderato a keda demostrá den tur funshon ku el a ehersé  i esei nan tur tabata motibu pa duna e rekonosementu ku e meresé. Durante e seremonia aki, minister Hato i sr. Maharo Isensia sekretario General suplente di BPD  a hiba algun palabra  i alabes gradisí Nadya pa e bon trabou ku el a bin ta ehersé i ta sigui konfiá ku e lo sigui inspirá, motivá  i guia e organisashon pa logra hopi mas.

 

Na nòmber di gobièrnu di Kòrsou en partikular i e ministerio di BPD, minister Hato ta deseá Nadya tur klase di éksito den su funshon nobo.