CBCS ta publiká Informe di Stabilidat Finansiero 2025 Banko, seguro i fondo di penshun ta resiliente apesar di insertidumbre

CBCS ta publiká Informe di Stabilidat Finansiero 2025
Banko, seguro i fondo di penshun ta resiliente apesar di insertidumbre

WILLEMSTAD/PHILIPSBURG – Oumento di konflikto geopolítiko, instabilidat den komèrsio
internashonal i merkado finansiero, i krímen sibernétiko tabata algun di e riesgonan importante
pa stabilidat finansiero den 2024, i te ainda den 2025. No opstante, sektor finansiero di e union
monetario a keda firme. Ante e oumento di insertidumbre riba plano internashonal, Presidente
di Centrale Bank van Curaçao en Sint Maarten (CBCS), Richard Doornbosch, ta keda
koutelosamente optimista. Asina por lesa den e Informe di Stabilidat Finansiero (FSR) di CBCS
pa 2025.
E informe FSR pa 2025 ta kubri kuarentishete instituto finansiero lokal (banko, seguro i fondo di
penshun) ku ta operá den nos union monetario. Huntu, e institutonan akí ta atministrá
aproksimadamente Cg 28 mil mion na aktivo, loke ta mas di tres bes e PIB di e union monetario.
Pa loke ta trata aktivo ku rendimentu fiho, e institutonan finansiero tin un bon aña tras di lomba.
Fuera di esei, sektor finansiero a benefisiá bastante di e kresementu ekonómiko na Kòrsou, impulsá
pa turismo. Espektativa ta ku ekonomia lo sigui krese den 2025, aunke insertidumbre den e
merkadonan internashonal i un bahada den aktividat turístiko por stroba. Ta teme ku e polítika
komersial di Estádos Unídos por okashoná un oumento di inflashon i ku aktividat ekonómiko di e
ekonomianan prinsipal por sufri un kaida. E tipo di desaroyonan ei por tin diferente efekto, direkto
i indirekto, riba sektor finansiero di Kòrsou i Sint Maarten. E derechonan di importashon i gueranan
komersial di Estádos Unídos por afektá inflashon i défisit komersial di algun merkado estranhero
ku ta hunga un papel klave den kresementu di nos industria turístiko. Segun ku e riesgonan
geopolítiko ta oumentá, CBCS ta mustra riba e importansia di ta bon prepará.
Por lo general, 2024 tabata un bon aña pa sektor bankario. E sifranan ku ta ser usá pa evaluá solides
finansiero di e institutonan akí tabata stabil. E bankonan tin un nivel sólido di kapital i likides, ku ta
sirbi komo un fundeshi firme den kaso ku nan mester apsorbé shòk. Kalidat di nan aktivonan a
mehorá danki na un bahada den e fiansanan improduktivo. No opstante, e fiansanan atrasá mester
ser vigilá djaserka. Aunke rentabilidat di e institutonan akí a oumentá, riesgo di krédito ta keda un
punto di preokupashon ku por rekerí sierto medida adishonal.
Prestashon di e invershonistanan institushonal por lo general tabata stabil. E seguronan di bida i
fondonan di penshun a benefisiá di e bon resultadonan di nan invershonnan den 2023. Na nan
turno, e seguronan di riesgo a keda resiliente apesar ku nan gastunan a oumentá. Ámbos sektor ta
bon posishoná pa por enfrentá e retonan ku ta na kaminda. E seguronan di riesgo ta sigui vigilá e
kondishonnan internashonal di reaseguro, ku ta birando mas stringente, i e gastunan di inflashon,
miéntras ku e seguronan di bida i fondonan di penshun ta enfrentá riesgo debí na e instabilidat di
e merkadonan internashonal. Ademas, e fondonan di penshun ta sigui enfrentá e retonan
relashoná ku embehesementu di poblashon i oumento den espektativa di bida.
CBCS ta publiká e informe FSR ku e meta di informá tur stakeholder i públiko en general tokante
estado di e sistema finansiero di e union monetario di Kòrsou i Sint Maarten. E informe ta ekspresá
e diferente faktornan di riesgo den sifra i ta deskribí senario ku por pone sistema finansiero bou di
strès. Tambe, e ta identifiká e faktornan prinsipal ku por tin un efekto negativo riba stabilidat
finansiero i kon e efektonan ei lo por plama. Den e periodo di insertidumbre ku nos ta enfrentando,
ta esensial pa e institutonan finansiero na Kòrsou i Sint Maarten keda proaktivo i ku vishon pa
futuro. Huntu, nos ta sigui traha pa garantisá stabilidat i resiliensia riba término largu, den un
panorama internashonal kada bes mas kompleho.
E teksto kompleto di e Informe di Stabilidat Finansiero di 2025 ta disponibel riba wèpsait di CBCS
na: https://www.centralbank.cw/publications/financial-stability-reports/2025.
Willemstad, 12 di mei 2025
CENTRALE BANK VAN CURAÇAO EN SINT MAARTEN