Aqualectra ta anfitrion di e konferensha pa Chief Executive Officers (CEOs) i Chief Financial Officers (CFOs) di kompania di koriente Karibeño, i Finansa, entre dia 18 te 21 di mei.
E aña aki, Aqualectra ta anfitrion di e konferensha pa Chief Executive Officers (CEOs) i Chief Financial Officers (CFOs) di kompania di koriente Karibeño, i Finansa, entre dia 18 te 21 di mei. Tema di e konferensha ta: “Watt’s Next in Leadership: Navigating Uncharted Territories.”
CARILEC ta un asosashon karibense ku tin 128 miembro, ku ta inkluí kompania di koriente di e region Karibe, proveedor independiente di koriente, suministradó di produkto pa e sektor di energia i miembronan individual ku ta enbolbí ku elektrisidat via trabou, studio òf inbestigashon.
Den su palabra di bon biní, Direktora Finansiero di Aqualectra i aktual Direktora Interino, Sra. Neysa Isenia, a bisa ku ta un honor pa Aqualectra pa ta anfitrion di e konferensha di e aña aki. El a bisa ku nos ta biba den un tempo kaminda liderato ta eksigí mas ku solamente bista i ekspertisio. “E ta rekerí kurashi. E ta rekerí klaridat. E ta rekerí konsenshi. I definitivamente konekshon.”
Sra. Isenia a sigui bisa ku p’esei e ta kere ku e konferensha akí ta e momentu ideal pa eksplorá e témanan aki huntu.
Presidente di CARILEC, señor Roger Blackman, Direktor General di Barbados Light & Power Company Ltd., a bisa durante e seshon di apertura ku CARILEC ta keda un partner konfiabel, ku ta yuda move e sektor dilanti ku resilensia, innovashon i propósito. “Komo un asosashon, nos meta stratégiko ta kla. Entre e metanan aki ta e nesesidad pa desaroyá kapasidat tanto na nivel individual komo na nivel regional, pa aselerá integrashon di energia renobabel, amplia kolaborashon regional i sostené inovashon digital. Pa logra e metanan aki ta eksigí boluntad kolektivo i kompromiso total di tur miembronan di CARILEC. Señor Blackman tambe a anunsiá ku esaki lo ta e último evento bou di su liderato komo presidente. El a yama tur kompania di koriente miembro, proveedor independiente di energia, miembronan asosiá i afiliá pa “enbolbimentu mas profundo, kontribuí aktivamente i forma e futuro di e asosashon huntu ku nos.”