​Hopi pasahero ku but habrí na Hato

Hopi pasahero ku but habrí na Hato

Dianan 6, 7, 8, 9 i djaluna 12 di yüni a tene kontrol na airopuerto Hato pa loke ta trata butnan habrí. 

Durante e kontrolnan a bin topa ku alrededor di 50 pasahero ku butnan no-pagá. Varios a drenta areglo di pago mientras ku otronan mesora a paga nan but pa evitá ku nan ta pèrdé na vuelo. A kobra durante e akshonan na airopuerto alrededor di 10.000 florin.

E akshonan tambe tabata tin su reflekshon riba esnan ku a akudi na ofisina di Paga Bo But na Waaigat. Einan a kobra durante e dianan di akshon, inkluso awe, mas o menos 85.000 florin.

Ministerio Publiko (OM) di Korsou ta supliká  suidadanonan pa akudí na Paga Bo But, p’ariba di Curoil riba Waaigat pa kumpli ku nan deber pa evitá tardansa i inkumbinensia na Hato i durante kontrol den trafiko. 

OM ta anunsiá ku akshonan lo intensiva e proksimo dianan. Na ofisina di Paga Bo But por drenta areglo di pago di 10 luna, por paga késh i por swaip ku bo karchi di banko. 

Ofisina di Paga Bo But ta habri durante dianan di siman di 07:30 pa 11:30 or i di 13:30 pa 16:30 or.

Ministerio Publiko su Ofisina di Paga Bo But a haña yudansa pa e akshonan na Hato di varios instansia manera entre otro Imigrashon ku polis, Marechausse, polis i CAP. Tur ta satisfecho ku e manera ku e kolaborashon i e akshonan na Hato a tuma lugá.