E evento aki a uni diferente profesional, mayor, representante di instancianan relevante y lider di comunidad pa traha hunto riba consciencia, referencia y inclusion.

Minister di Salud Publico, Asunto Social, Cuido di Adulto Mayor y Maneho di Adiccion, drs. Mervin Wyatt-Ras a asisti na e tayer di Autismo y  a duna un discurso den cual e mandatrio a enfatisa cu “Autismo no ta un sentencia. Un mucha of un persona cu tin autismo ta un individuo unico cu retonan special. Un persona cu derecho.”

Durante e actividad, e derechonan esencial di personanan cu autismo tabata e enfoke di atencion:

• Derecho pa ricibi cuido y ser protegi;
• Derecho pa haya ayudo y sosten adecua;
• Derecho pa haya oportunidad pa desaroyo di talento;
• Derecho pa bay skol y sigui forma su futuro;
• Derecho pa inclusion den comunidad, sin discriminacion ni bully.

Den nos comunidad, personanan cu reto, limitacion of problema manera autismo, ainda ta confronta exclusion, falta di comprension y desbentaha.

E tayer a pone enfasis riba necesidad urgente pa:

• Diagnostico y referencia trempan;
• Referencia rapido na medico y expert;
• Reduccion di e tempo di espera;
• Trato segun condicion individual;
• Uzo efectivo di data pa traha maneho basa riba realidad;
• Vision y maneho duradero riba largo plaso.

Segun Minister Wyatt-Ras, gobierno ta trahando riba reforma legislativo pa:

• Fortalece e ley di bijstand y e ayudo pa personanan cu limitacion;
• Duna sosten financiero pa famianan cu mucha den edad di 0 pa16 aña;
• Sostene idea- y plannan pa educacion y desaroyo continuo di e muchanan.

“Cu apoyo y yudansa trempan, comprension, empatia, educacion pa famia y comunidad, inclusion, nos por yuda un mucha of hoben cu autismo haya su caminda den skol, trabou y den comunidad,” Minister Wyatt-Ras a bisa.

E tayer di awe ta parti di un movemento pa crea un Aruba mas husto, mas comprensivo y mas accesibel. Un pais unda tur individuo, sin importa su desaroyo, por conta riba sosten, respet y oportunidad real.