Siman di conscientisacion riba
Abuso y Maltrato di Adulto Mayor

 

Skirbi pa: Proyecto F.A.A 2025.: ‘No Na Abuso di Adulto Mayor’
Diasabra 14 di juni proximo Fundacion Alzheimer Aruba (F.A.A.) den cooperación cu MFA
Santa Cruz ta organisa un Simposio cu e tema: ‘Promove Protecion y Husticia Pa e Victima di
Abuso y Maltrato di Adulto Mayor’
Desde 2008, e proyecto di Fundacion Alzheimer Aruba (F.A.A.) “Bisa No na Abuso di Adulto
Mayor” compromete su mes pa apoya y yuda protege derechonan humano y civil, incluyendo pa
e personanan Mayor di Edad y esnan dependiente. Hopi persona mayor di 50 aña na Aruba
(Baby Boomers: naci entre 1946 y 1964, y e generacion silencio, naci entre 1928 y 1945) a
actua proactivo pa entreotro nan derecho di pensión, soro pa regla nan entiero y pa su famia no
falta pan di cada dia riba mesa. Desafortunadamente, den henter mundo, miyones di persona
mayor di edad y dependiente ta victima di individuonan sin escrupulo cu ta trata di isola nan di
nan famia y amigonan pa por abusa di nan victima; ta prescibi mucho medicamento y/of ta forsa
nan di tuma e medicamento; ta likida nan bienes; nan cuentanan bancario ta wordo pluma of mal
usa financiera-mente; ta saca nan di nan ambiente familiar y sigur; y a lo largo ta obliga nan,
contra nan boluntad, pa bai den un cas di cuido, unda nan sa di wordo maltrata (físicamente,
mentalmente y te hasta sexualmente).
E ciudadanonan aki hopi biaha orguyoso y decidido, actualmente ta forma un grupo di persona
sin proteccion.
Mayoria di Adultonan Mayor cu ta acudi na Fundacion Alzheimer Aruba ta expresa nan
desconfiansa den autoridadnan cu no ta tuma nan na serio ora nan haci un denuncia di maltrato.
Hopi biaha nan ta sinti nan mes como un ciudadano di segundo clase. Despues di un diagnostico
verbal di Alzheimer, cu hopi biaha no ta confiabel, awendia a bira normal cu ta conseha e

Adulto Mayor pa bai un cas di cuido, lamentablemente sin sa cua tipo di cuido of tratamento ta
mas adecua pa su condicion neurocognitivo. Algun familiar ta consciente di esaki y ta laga sa cu
nan no tin claridad con pa anda cu e malesa aki. Y te hasta ta sali mas bruha despues di a haya
splicacion di e diagnosis y ta parse cu simplemente No sa of ta insigur di e contesta. Hopi biaha
e famia ta haja tende cu NADA mas por wordo haci y cu mester siña biba cu e posible malesa
aki. Pa algun persona “Anciano” ta mas tanto un sinonimo di “Morto”, siendo e Adultonan
Mayor ta leu di esey.
Desde 2008, F.A.A. ta comprometi pa cu e dignidad di nos Adultonan Mayor, nan derechonan
civil y constitucional pa, tambe despues di e edad di 70 aña, nan lo por keda mantene of recobra
derechonan pa conserva igualdad sin discriminación pa edad (edadismo) cu enfoke riba
derechonan general di Adultonan Mayor den salubridad publico. E rapportnan emiti door di IVA
(Inspectie Volksgezondheid Aruba), entre otro “Vooruitblik op Langdurig Zorg : Hoe staan we
ervoor?” (2018) y e rapport ”Jaarbeeld Valincidenten Verzorgingshuizen”, (2023) 22 maart
2024, ta cla y raspa y ta confirma situacionnan y e falta di profesionalidad den e casnan di
cuido. E momento a yega pa haci mas investigacion y entreotro pa compara con e cuido ta
wordo organiza y implementa den otro paisnan. Di e manera aki por desaroya un maneho crioyo
adapta pa un trato digno pa e Adulto Mayor, sin discriminacion di edad, abuso, maltrato y
negligencia.
Nos sistema di ley ta enfoca nos como ciudadano, Nos Adultonan Mayor riba tereno di derecho
civil, como ciudadano mester por confia cu nos Corte ta atende nan como ciudadano y cu nos
Adultonan Mayor, sin duda, merece nan derechonan humano, civil y constitucional, igual cu e
derechonan regla den e ley pa Adulto Mayor den cuido y salubridad, aplica na Hulanda pa e
Reinado Hulandes.
Comunidad ta bon bini na e simposio Diasabra proximo na MFA Santa Cruz. Registracion ta
cuminsa 10:30 a.m. Horario di Simposio ta 11;00-4:00 p.m. Entrada ta gratis.