KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

Referèndum igual pa tur trahadó

Pa: Señor Alfeo Profas
Mediadó di Gobiernu di Kòrsou
Schouwburgweg 26
Willemstad, Kòrsou
Topiko: Referèndum igual pa tur trahadó
Willemstad, 11 yüni 2025
Apresiabel señor Profas,
131 miembro afilia na sindikato Curaçaose Bond van Werknemers in Verplegende en Verzorgende Instellingen (CBV) laborando den Analytisch Diagnostisch Centrum N.V. (ADC N.V.), ta dirigi nos mes na Mediadó di gobiernu pa ekspresá nos prekupashon i posishon tokante e idea pa partí e referèndum entre diferente grupo di personal, manera staf kontra otro empleadonan.
Nos ta kere firmemente ku kada un di nos, sin importá nos funshon òf posishon, tin mesun derecho pa partisipá den un desishon ku ta afektá nos tur. Referèndum ta un instrumento demokrátiko kolektivo i no mester sirbi pa dividí nos, sino pa uní nos. Hasi un distinshon entre kategoria ta no solamente inhustu, pero tambe ta pone preshon innesesario riba nos ambiente laboral.
Na pagina 4 di nos ultimo CAO di ADC N.V. por lesa e definishon di trahado (werknemer) ku ta ensera tur trahado ku eksepshon di gerensia, konforme Statuto di ADC N.V.
Nos ta urgi pa tene e referèndum sin divishon. Nos ke un bos igual, un voto igual, i un proseso igual pa tur trahadó. Asina nos por tin un desishon ku ta reflehá nos union i respet mutuo den nos organisashon.
Nos ta spera Mediadó di gobiernu konsidera nos solisitut i brinda e apoyo pa protehá nos derecho pa igualdat i unidat den e proseso di Referèndum.
Konsiderando lokual ku nos a trese dilanti, nos ke urgi Mediadó di gobiernu pa start e proseso di Referèndum mas pronto ku ta posibel.
Ku respet,
Miembronan di CBV laborando den ADC N.V.
C.c. Gerensia di ADC N.V.
Bestür CBV

Leave a Reply

This site uses Akismet to reduce spam. Learn how your comment data is processed.