MLB ELITE CURAÇAO RUMBO PA VERO BEACH FLORIDA
MLB ELITE CURAÇAO RUMBO PA VERO BEACH FLORIDA
WILLEMSTAD – Pa di dos aña konsekutivo hungadónan di MLB Elite Development Program (EDP) Curaçao ta rumbo pa Vero Beach, Florida pa partisipá na e torneo Breakthrough Series Invitational 2025 organisá pa Major League Baseball. Un total di 16 tim di rònt Merka, Puerto Rico i un tim kombina ku hungadónan di Brasil i Kòrsou lo partisipa na e prestigioso torneo aki. E torneo lo tuma lugá di 18 pa 21 di yüni na Jackie Robinson Training Complex na Vero Beach, Florida. E aña aki 8 hungadó di Kòrsou a keda selektá i nan lo uni ku 12 hungadó di e programa di Brasil pa asina forma e tim ku lo yama MLB International.
Breakthrough Series ta pa hungadónan U17 di e mihó programanan di desaroyo di beisbòl di MLB. E tipo di torneonan aki semper ta hala hopi atenshon di scoutnan di tur e 30 ekiponan di MLB i tambe scout di universidatnan i skolnan sekundario Merikano. Pues nos hungadónan lo por konta ku hopi atenshon riba nan. E hungadónan di Kòrsou ku ta bai e aña aki ta: Shawn Dambruck, Chey-Niël Delanoy, Emery Hansen, Archeneau Martina, I-Zion Mogen, Victor Nieves Mack, Ruchano Petronia i Sebastian Ramirez Russo. E aña aki MLB a asigna Rudy van Heydoorn, instructor di kècher di Elite Curaçao, komo e manager di e tim internashonal. Pa MLB ta importante na no solamente nos hungadónan desaroya pero tambe nos coachnan lokal.
Komo parti di nan preparashon pa e torneo e 8 hungadónan selektá a risibi un seshon spesial di ‘mental training’ di nos eks atleta olímpiko Churandy Martina i Thakai Doran. Tantu Martina komo Doran ta profeshonalnan sertifiká i eksperensiá pa duna tipo di training asina aki. E hungadónan a risibi tepnan balioso kon nan mester aktua, komporta i rekordandonan ku esaki ta un oportunidat úniko ku nan ta haña pa demonstrá nan abilidatnan beisbòlistiko.
E sponsornan lokal di e programa ku ta Curaçao Tourism Board (CTB) huntu ku Curaçao Baseball Development Foundation ta desea nos peloteronan tur klase di éksito i pa semper mantene e nomber di pais Kòrsou na haltu.
