Frakshon MAN-PIN ta entrega inisiativa di lei: PENSHUN DI BEHES (AOV) MESTER SUBI SEGUN KOSTO DI BIDA

Frakshon di MAN-PIN a entrega inisiativa di lei pa subi penshun di behes (AOV) alabes esun di viuda i werfano, segun ku kosto di bida ta subi (prijsindex). Esaki ta pa yuda drecha forsa di kompra di e penshonado.

Na 2013 a hasi kambio pa e penshun di behes subi segun kresementu real di ekonomia. Den praktika esaki no a duna resultado positivo na fabor di e grupo grandi di penshonado i sigur no pa esun ku ta kobra solamente penshun di behes.

MAN-PIN for di su programa di akshon presenta den elekshon ta para den mehora kalidat di bida di nos komunidat di un manera duradero i struktural.

Awor e kambio di lei mester kana e kaminda di konseho di SER i Raad van Advies pa despues keda trata den parlamento pa asina mas lihé posibel nos por hasi e kambio aki na fabor di e penshonado.

Di e forma aki nos ta keda duna nos aporte komo frakshon MAN PIN, ounke den oposishon, pa drecha bibá di pueblo di Kòrsou.